Mizo Idol 2018 Zaninah mi 45 an zai dawn August 16 zan aṭangin second round

Mizo Idol Season 6 chu a boruak a 'hot' chho zel a, kum dang aiin audition pawhin thawm a nei lian zawk. Zaninah Aizawl Audition chhunzawm a ni leh dawn a, mi 45 an zai ang. Hetih lai hian District paruk aṭanga second round lut te chuan August 16 aṭangin intihsiak an hmachhawn zui dawn. 

Mi pathum bawk

Nilai zan khan Zonet Studio-ah audition neih leh a ni a, zan hmasa ang bawkin audition result puan hmaa second round lut sa mi pathum an awm leh. Audition-a zai zingah mahni veng leh kohhran vela zai ṭhang tak tak an awm tih a chiang a, result puan a nih hma hauha tling chiang sa an awm.

Aizawl Audition hi result puan a la ni lo a, chu tih rual chuan contestant zingah judge-te'n tling chiang sa-a dah an nei nual. Mi paruk te chuan second round an lut chiang tawh a, nizan lam result kan hre hman lo thung. 

Nilaini zanah bik khan a zan hmasa aiin inlan an tam a, tling pawh an tam zawk dawn niin endiktute kam chhuak a ṭangin a lang. Ṭum dang angin 'mi tihlimtute' ang chi kha an tlem ta zawk a, hei hian he intihsiak hlutna a tilang ni pawhin a ngaih theih bawk.

Second round chu

Kar leh Thawhleh zanah Aizawl Audition a zo dawn a, Ningani zan aṭangin second round-in a zui nghal ang. August 16 zanah District pathum - Champhai, Serchhip leh Lunglei aṭanga tling mi 45 te an intihsiak dawn. 

Champhai Audition-ah mi 56 an inlan a, mi 14 an tling. Serchhip District-ah mi 27 an inlanin, mi 10 an tling a, Lunglei Audition-a inlan 68 zinga mi 15 ten second round an lut bawk. District pathum aṭanga audition paltlang hi mi 39 an ni a, second round lusa te nen an vaiin mi 45 an ni. Mizo Idol 2015-a top 50 te chu second round lut sa an nih avangin audition-ah hian an tel ve lo a, August 16 zan aṭangin intihsiak an hmachhawn ṭan ve dawn a ni.

August 17, Zirtawp zan aṭangin Lawngtlai, Siaha leh Kolasib District aṭang tling mi 47 te an inlan zui ve bawk dawn a ni. 



Share this Post

Login to comment
No Comments