Vincy Chhangte a rawn inlar dawn MLTP Act tour-in Zoram hrût dawn

Mizo rapper zinga hlawhtling leh thiam Vincy Chhangte chu hun eng emaw chen a bo vang vang hnuah rap game-ah rawn zuang lût lehin, material ṭha zawk nen Inrinni zan aṭang khian MLTP Act tour a ṭan dawn a. He tour-ah hian Mizoram hmun hrang hrang fangin a chhuak ang.

Vincy tour-ah hian Mizo Idol-a mi Biakmuana'n a pui dawn a, tun Inrinni zan dar 7 hian Vanapa Hall-ah tour bulṭanna concert neih a ni ang a, October 1 & 2 hian Serchhip leh Thenzawlah te tour an neih chhunzawm ang a. Hengte bakah hian Lunglei, Mamit, Khawzawl leh khawpui lian dangte an fang ang.

Vincy chuan MLTP Act tour hi Mizorama zu khap burna dan duh loh lantirna tour a ni nghal dawn a. October thla chhunga zawh hman tur a ni a. Biakmuana bakah zaithiam dangte pawhin an pui dawn ang. Tour-ah hian Turn Table DJ a hruai bawk dawn a, Mizorama DJ pangngai tak tak nena tour neih hmasa ber tur a ni ang.

MLTP Act Tour hi a album thar, tihchhuah mai tur, 'Kei leh MLTP Act' tihlar lawkna tur a ni a. He album hi Vincy chuan October thla hian release a tum a. Audio CD tur a ni ang a, hla 20 a awm ang a, heng hlate hi ama phuah an nih vek bakah, a record leh music pawh ama tih vek bawk a ni.

Vincy chuan a album-a hlate hi MLTP Act sawiselna a ni dawn tih a sawi a, hei bakah hian political issue lam a ni ber ang a, love song pawh a awm ang, a ti. He album aṭang hian Zofate Tan tih chu single-in a tichhuak tawh.


Share this Post

Login to comment
No Comments