Puk ṭihbaiawm - Tham Luang cave

Thailand, Mae Sai District, Chiang Rai Province-a puk thuk tak mai 'Tham Luang cave ' hi tunah chuan khawvela puk lar ber pawl a ni ta. Kilometer 10 zeta thukah hian Wild Boar soccer team leh an coach te chu ni 20 dawn an tan tak avangin, 'Puk ṭihbaiawm' tia sawi a nih phah ta a ni. 

Tham Luang cave hian tun hma chuan hriat a hlawh ngai lem lo a, a chanchin hriat tur pawh a tam lo hle. Mahse June 23-a Wild Boar soccer player 12 leh an coach pakhat an tan hnuah chuan khawvelin a hre chiang tawh a, luhchhuah a harsat zia leh, tui a luan luh theih avanga a hlauhawm zia chu titi pui ber a ni ta. 

Meter 10,000 zeta thuk puk ropui leh ṭihbaiawm tak mai hi 'Great Cave of the Sleeping Lady' tia sawi ṭhin a ni a, a hming hian awmze thui tak a neih ngei pawh a rinawm. Lut chhuak parh tur chuan darkar tam tak a ngai dawn tih a chiang a, a puk hi a khawkrawk hle bawk. Hmun ṭhenkhat chu mihring len mang lohna te niin, lungkhawk rawk tak tak kara sang tak tak lawn a, chhuk leh ngai te a ni nawk. 

Puk luhna tawn tirh hi hmun hniam lai a nih avangin tui a lut thei a, vanduaina thlen chhan pawh hi a ni. Ruah nasa tak a sur a, chu chu puk chhungah hian luang lutin a chhunga awm mek te tan chhuah ngaihna a awm ta lo a ni. Tui hi a tam em avangin puk chhunga awm te hian hmun him an pan zel a, km 4 vel zetah himna an hmu ta chauh a ni. 

Dam khawchhuak a, khaw eng hmu leh tur erawh chuan hmabak a ko tih an chiang. Beidawng leh hlauthawng taka ni kua zet an awm hnuah hmuhchhuah an ni chauh a, lakchhuah hna thawh mek a ni. 

Tham Luang cave hi Thailand leh Myanmar inrina bawra awm niin, fur ruahtui tla hian kum tin harsatna a thlen ṭhin a ni. 



Share this Post

Login to comment
No Comments