Box Office Jurassic World nek chhuaktu Ant-Man and the Wasp

Fantasy/science fiction film chhuak thar 'Ant-Man and the Wasp' chu Box Office-ah a che ṭha nghal hle a, Jurassic World: Fallen Kingdom rorelna titawptu a ni. 

July 4-a tlangzarh Ant-Man and the Wasp hian kar liamta chhung khan $mtd 76 zet lalutin, dinhmun sang ber a luah nghal chat. Hetih lai hian Jurassic World: Fallen Kingdom chuan $mtd 28.6M a lalut a, sum lakluh tam lamah hian Peyton Reed-a film siam a phak lo hle. American actor Paul Rudd leh Canadian actress Evangeline Lilly te channa film hi South Korea lamah pawh a hit viau a, $mtd 20.9 lai a hlawhchhuak a ni. 

Bristish actress Hannah John-Kamen leh Michael Douglas te inlanna film hi Indonesia-ah tlangzarh a ni a, khawvel hmun hrang hrangah chhuah chhoh mek zel a ni. 

Hetih lai hian Jurassic World: Fallen Kingdom pawh tunlai film chhuak thar zinga en hlawh ber pawl a ni zui zel a, a sum lakluh tlahniam deuh tawh mah se a la hit reng tho. Chris Pratt leh Bryce Dallas Howard te channa film hian Box Office aṭang ringawt pawhin $mtd 990.4 zet a lalut tawh a, hmun dang aṭanga a lakluh tawhte nen chuan $tld 1 chuang zet a tling tawh a ni. 

Incredibles 2 chu sum lalut tam pathumna niin, The First Purge chuan a dawt. Top 10-ah hian film chhuak thar inlar eng emawzat awmin, chung zingah chuan Sicario: Day Of The Soldado leh Uncle Drew pawh an tel. Heng film pahnih te hi June thlaa tlangzar kha niin, sum pawh an thawkchhuak ṭha viua bawk. 

Top 10-ah hian Ocean's 8, Tag leh Deadpool 2 te chu an lang ve leh bawk. Hetih lai hian kar hmasa lama lang Bollywood film Sanju erawh sum lalut hnem zual zingah a tel pha ta lo a ni. 

Box Office-a a lan phak tak loh avang hian Sanju film hi dah hniam ngawt theih a ni lo. Tlangzarh aṭanga ni 11 a liam meuh chuan vaibelchhe 300 a thawk chhuak der tawh! Ranbir Kapoor leh Sonam Kapoor te channa film hi Indian Box Office-ah pawh roreltu a ni mek a, kumina Bollywood film chhuak tawh zingah chuan a hit ber pawl a ni. 

Box Office Top 10

1. Ant-Man and the Wasp - $mtd 75.8

2. Jurassic World: Fallen Kingdom - $mtd 28.6

3. Incredibles 2 - $mtd 28.4

4. The First Purge - $mtd 17.4

5. Sicario: Day Of The Soldado - $mtd 7.6

6. Uncle Drew - $mtd 6.6

7. Ocean's 8 - $mtd 5.1

8. Tag - $mtd 3.0

9. Won't You Be My Neighbor - $mtd 2.6

10. Deadpool 2 - $mtd 1.7



Share this Post

Login to comment
No Comments