Box Office Jurassic World chunga leng Avengers: Infinity War

Rin lawk ang ngeiin Avengers: Infinity War chuan record a siam leh ta a, kar liamta chhung khan Box Office-ah $mtd 7 lalut lehin, sum lakluh tam lamah Jurassic World a khum ta a ni. Infinity War hi film chhuak tawh zinga sum lalut tam palina a ni ta a ni. 

April thlaa tlangzarh Avengers: Infinity War hian $tld 2 a lalut tling tawh a, heti zat sum lalut thei hi film pali chiah an la awm a ni. Sum lakluh tam lama Jurassic World a khum rual hian Infinity War hian sum lalut tam pahnihna Titanic chu a hnaih sawt bawk. Sum lalut tam ber dinhmun lo luah tawh Titanic bakah hian, Star Wars: The Force Awakens pawh a hnaih sawt viau a, tun ang renga a kal chuan record a siam belh ngei a rinawm hle. 

Sum lalut hnem zual

Kum 2009 December thla khan Avatar film tlangzarh a ni a, sum lalut hnem ber tur a ni ang tih ring an tam awm lo e. Mahse beisei phak bakin a hit a, tunah chuan khawvela sum hailut hnem ber ($tld 2) a ni der tawh. Avatar hian hun rei tak chhung record lo siam tawh Titanic chu khumin, dinhmun sang ber a luah mek a ni. 

Titanic hi kum 1997 daih tawha tlangzarh niin, tun lai film lar ber ber te pawhin an la khum thei meuh lo. Khawvel hmun hrang hrang aṭangin $tld 2.18 zet a lalut tawh a, film chhuak tawh zinga hlawhting ber te zinga mi a ni. Hetih lai hian kum 2015-a tihchhuah Star Wars: The Force Awakens chu sum lalut tam pathumna ($tld 2.06) a ni a, Avengers: Infinity War nen an sum lakluh a inthlau lo hle. Jurassic World pawhin $tld 1.6 zet lalut tawhin, top 5-ah a lang phak a ni. 

Sum lalut hnem Top 5

1. Avatar - $tld 2.78

2. Titanic - $tld 2.18

3. Star Wars : The Force Awakens - $tld 2.06

4. Avengers: Infinity War  - $tld 2

5. Jurassic World - $tld 1.67

Box Office

Tun ṭum Box Office-ah hian Ocean's 8 chu sum lalut hnem ber a ni a, $mtd 41 zet a lalut. Thriller film Ocean's 8 hi June 7 khan tlangzarh a ni a, North America-ah chuan en hlawh ber a ni mek. Sum lalut hnem ber nihna lo hauh tawh Solo: A Star Wars Story chuan $mtd 15 a lalut leh a, pahnihna a hauh. Deadpool 2 chu sum lalut tam top 3-ah a lang ve leh bawk. 

Tun thlaa tlangzarh tho Thriller film Hereditary chuan $mtd 13 lalutin palina a hauh a, Avengers: Infinity War chuan kar liam ta chhung khan $mtd 7 lai a lalut ve leh bawk. 

Top 10-ah hian Adrift leh Book Club te an lang ve leh bawk a, kar liamtaa tihchhuah Hotel Artemis chu pariatnah a awm. Upgrade ($mtd 2.3) leh Life of the Party ($mtd 2.1) te chu a sang sawm zingah hian an tel ve bawk. 

Box Office Top 10

1. Ocean's 8 - $mtd 41

2. Solo: A Star Wars Story - $mtd 15

3. Deadpool 2 - $mtd 14

4. Hereditary - $mtd 13

5. Avengers: Infinity War - $mtd 7

6. Adrift- $mtd 5

7. Book Club - $mtd 4

8. Hotel Artemis - $mtd 3

9. Upgrade - $mtd 2.3

10. Life of the Party - $mtd 2.1



Share this Post

Login to comment
No Comments