Box Office Avengers: Infinity War khum thei la awm lo

Kumina film chhuak tawh zinga thawm nei lian ber Avengers: Infinity War chu US Box Office-ah a che ṭha zui zel a, khum thei an la awm lo. He science fiction film hian a zawnin kar thum chung chu sum lalut hnem ber dinhmun a luah tawh a, khawvel huapa sum lalut tam zual panga zingah a tel tawh bawk.

American film Film producer lar Anthony Russo leh Joe Russo te kut chhuak film hi khawvel hmun hrang hrangah chhuah chhoh mek a ni a, China-ah pawh tichhuah a ni tawh. Infinity War hian kar liamta chhung khan $mtd 61.8 zet a lalut leh a, Box Office aṭanga a sum lakluh tawh zat chu $mtd 547.8 zet a tling tawh. 

China aṭang ringawt pawhin $mtd 200 vel zet a lalut tawh a, kar liamta chhung khan khavel hmun hrang hrang aṭangin $mtd 349 zet a lalut leh a ni. A sum thawhchhuah tawh zawng zawng hi $tld 1.6 chuang zet a tling tawh a, film chhuak tawh zinga sum lalut tam ber panga-na a ni. 

Top 5

Hollywood star rual inlanna Infinity War hian sum lakluh tamlamah Furious 7, Frozen, Black Panther, Star Wars: The Last Jedi leh  Harry Potter and the Deathly Hallows - Part 2 te a khum a ni. Hei mai hi a la ni lo a, Jurassic World khumin pali-na dinhmun luah thei turin a dinhmun a ṭha hle. Hetih rual hian Force Awakens ($tld 2), Titanic ($2.1) leh khawvela sum lalut hnem ber Avatar ($tld 2.7) te chu a la hlat viau thung. 

Infinity hi Brazil-ah chuan sum lalut hnem ber a ni mek a, Central America, Bolivia, Venezuela, Philippines, Indonesia, Malaysia, Singapore, Vietnam leh India-ah te pawh tuma tluk rual lohin a kal fawr mek. 

China-ah pawh a che chhe lo a, kar kalta Zirtawpni khan chhuah ṭan niin, hemi ni vek hian $mtd 71 zet a lalut nghal. China-ah hian pekchhuah ṭan ni-a sum lakluh tam lamah Monster Hunt 2 ($mtd 86) chiah tluk loh a nei. Hetih lai hian superhero movie bikah chuan sum lalaut hnem ber a ni thung. 

Box Office

North American Box Office-a roreltu chu Infinity War a ni a, Life of the Party chu sum lalut tam pahnihna a ni. April 30-a tlangzarh Comedy film hian $mtd 18 zet a lalut a, Breaking In ($mtd 16) chuan a dawt. Comedy film dang Overboard chu sum lalaut tam zual zingah a tel bawk a, palina a hauh phak. 

Hetih lai hian No. 1 pawh lo hauh ve zawk tawh A Quiet Place chu top 5-ah alang pha ṭawk a, Dwayne 'The Rock' Johnson channa Rampage leh Black Panther te chu top 10-ah an lang bawk. 

Box Office Top 10

1. Avengers: Infinity War $mtd 61

2. Life of the Party$mtd 18

3. Breaking In$mtd 16

4. Overboard $mtd 10

5. A Quiet Place$mtd 6

6. I Feel Pretty$mtd 3,7

7. Rampage$mtd 3,3

8. Tully$mtd 2

9. Black Panther$mtd 1,9

10. RBG$mtd 1,1



Share this Post

Login to comment
No Comments