MDM Mizo hla inphuahsiak 2018 April 18-ah a thlirlawkna nei dawn

Music Domain Mizoram (MDM) chuan mizo hla inphuahsiak an buatsaih thlirlawkna chu April 18 hian Ritz Hotel-ah an nei dawn. 

MDM chuan Mizo irawm chhuak hla thar tam zawk a chhuah theih beiseiin hla inphuahsiak an buatsaih a, hla eng emaw zat a lut tawh. Hetah hian a duh apiang tan tel theih a ni a, hla thehluh hun pawh hawn mek a la ni. 

Hetih rual hian MDM office insawn buai leh internet connection chian loh avangin April thlaa hlaa thehlutte chu an hla copy thehlut nawn leh turin an inngen a ni. Hla inphuahsiakah hian lawmman ṭha tawk tak a awm dawn an i. 

Pathian hla leh Lengzem/Lenglawng-ah ṭhen a ni a, mi pakhat tan hla pakhat ve ve thehluh theih a ni ang. Lawmman hi inelna chi hnihah hian pakhatna aṭanga pathumna thleng siam ve ve a ni ang a, top 10 chinten consolation prize an dawng bawk ang. 

Pakhatna hian pawisa fai Rs. 10,000, Christine Lalhlimpuii trophy leh certificate a dawng ang. Hei bakah hian Lords Studio leh Jh Home studio-te chuan a thlawn vekin sound track an siam sak ang a, voice recording hi Studio A-16, Chanmari-te'n an tih sak dawn. MDM Library hmalaknain Milestone picture leh A&Z Entertainment -te chuan music video an siam sak dawn bawk. 

Pahnihna leh pathumna te hian pawisa fai Rs 5,000 leh Rs 3,000 an dawn dawn bakah, Christine Lalhlimpuii trophy leh Certificate hlan an ni bawk ang. 

Intihsiakna atana hriat tur pawimawhte:

* Hla hi ruahṭhamloh a ni tur a ni.

* Pathian fakna hla leh lenglawng/lengzemah te top 10 chin hnenah lawmman pek an ni ang.

* Mi pakhat tan hla pakhat ve ve thehlut theih a ni.

* Hla thuah hian indeusawhna, thu bawlhhlawh leh khawtlang duh loh thil telh a remchang lo ang.

* Hla inphuahṭawm an awm chuan chiang taka ziah lan tur a ni. 

* Hla hi eng music instrument hmang pawha rem theih a ni tur a ni.

* A audio hi mp3 file-a dah tur a ni a, a phuahtu hming leh address chiang taka tarlan tur. 

* Hrechiang duh tan MDM Office, Bazar Bungkawnah office hun chhungin zawhfiah theih a ni a, Phone No. 7642806112-ah hian zawhfiah theih a ni bawk. 



Share this Post

Login to comment
No Comments