Hontrade Ṭhazual Lengzem Fakna C.Sanga hla phuah a No. 1

Hontrade Ṭhazual Lengzem Fakna-a No. 1 chu fam chang ta C.Sanga hla phuah 'I chakna ringin' tih MDM Various Artistes-te sak a ni. Music Domain Mizoram (MDM) chuan an president hlui C. Sanga pualin he music video hi an siam a, Zonet Ṭhazualah thlan hlawh ber a ni mek. He hla hi C.Sanga'n kum 2002 November thlaa a phuah kha niin, MDM artiste-te chuan an pualin an sa thar leh a ni. A video leh audio hian belhchian a dawl a, a hla hi ngaihtlak nuam tak a nih avangin thlan pawh a hlawh hle. Music video-ah hian tun lai Gospel Artiste lar - Awmawmi, BKA Bawihtlung, David Vanlalpeka, Fiona Pachuau, J.H lungmuana, Mawitei Ralte leh Zorina Ralte te an zai a ni.   

Tun ṭum chart-a pahnihna chu Lalhmangaihzuali (Nunui) a ni. Nunui hian 'Min kian san suh' tih hla hi a lar chhohpui mek a, thlan hlawh ber pawl a ni. Hun eng emaw chen hnuah Aizawl Venglai KṬP, Mika Group te chu 'Krawsah chuan famkim i ni' tih hla hmangin top 3-ah an invawrh kai bawk. Chart-a pakhatna lo hauh tawh Cindy, Arini, Mapuii te sak 'An fak ning lawng' tih chu thlan hlawh zual zingah a tel leh a, Jennie Lalruatfeli chuan top 5 a khar thung. Jennie pawh hian a ber nihna ṭum hnih ngawt a lo hauh tawh a ni. 

Chart-ah hian hmel thar kan hmu a, a vawi khat nan Ruthi CVL Muanpui chu top 10-ah a lang. Ruthi hian 'Amen ka pe lo thei lo' tih hla hmangin pasarihna a hauh a, chart-ah a hmel kan hmuh zuizel a beiseiawm hle. Hmanni lawka hla thar nena lo kir Zorinsanga Sailo pawh top 10-ah a lang bawk. 

Hontrade Ṭhazual Lengzem Fakna Top 10

1. Various Artistes - I chakna ringin

2. Lalhmangaihzuali (Nunui) - Min kian san suh

3. Aizawl Venglai KṬP, Mika Group - Krawsah chuan famkim i ni

4. Cindy, Arini, Mapuii - An fak ning lawng

5. Jennie Lalruatfeli - Ka thinlung lawmna

6. Esther Khiangte - Thlaler tuivalawng

7. Ruthi CVL Muanpui - Amen ka pe lo thei lo

8. Zorinsanga Sailo - Min hruai reng thin 

9. Lalnunpuii Kawlni - Ka enna 

10. Vanlalruata - Ka lawm e



Share this Post

Login to comment
No Comments