Valentine's Day pualin thisen pe ve rawh le

Naktuk February 14 hi Valentine's Day a ni a, Mizo High School Hall-ah hmangaihte puala thisen pek hun, Valentine's Day Blood Donation Camp huaihawt a ni leh dawn. Thisen pe tur hian sawm bik an awm lo a, midangte tana malsawmna nih duh chuan Govt. Mizo High School Hall pan mai tur a ni. 

Valentine's Day Blood Donation Camp hi Association for Voluntary Blood Donation (AVBD) chuan kum tin an buatsaih ṭhin a, kuminah pawh hian Music Domain Mizoram (MDM) nen thawkhoin an buatsaih leh dawn a ni. Valentine's Day puala thisen pek hi kum 2010 aṭang khan ṭan a ni a, buatsaih a nih tirh aṭangin Mizo ṭhalaite'n an hlut hle a ni. Kum 2012 aṭangin AVBD-in mumal lehzualin an kalpui a, kum tin buatsaih a ni ta zel a; ni khat thil thua Mizorama thisen pek tam ber ní a lo ni chho ta a ni. 

V-Day puala Blood Donation Camp neih turah hian MDM lamin zaithiam ṭhahnem tak a thawh chhuahpui dawn a, zaithiam lâr tak takte'n thisen pek laiin zaiin an lo awi dawn a ni. Zaithiamte hian lawmman an beisei lo a, mi tlawmngaite'n phût let nei miah loa a thlawna thisen an pek laiin zaiin mipui an lo awi ve thung dawn a ni. Chawhma dar 10:00 aṭanga ṭan tur a ni a, chhun dar 12-ah inaugural function hman tur niin, Mizoram minister zinga hmeichhe awmchhun, Vanlalawmpuii Chawngthu chu khuallian a ni ang. 

AVBD leh MDM-te chuan thisen pe turin Mizo ṭhalaite an sawm a; 'I kawppui nen emaw, i ṭhiante nen emaw, nangmah chauh pawhin rawn kal la; thisen rawn pe la, mi dangte tan malsawmna ni ang che,' tiin sawmna an siam a ni. V-Day Blood Donation-ah hian host pali - Henry Varte, Nunui Rualhleng, Ruth CVL Muanpuii leh Esther Sailo (Miss Mizoram 2017 runners up)-te an awm dawn a; host-te hian thisen pe a piang rose an lo pe zel dawn a ni. Blood Donation Camp hi District Headquarters tinah neih a ni dawn bawk. 



Share this Post

Login to comment
No Comments