Billboard 200 Album Chart Timberlake-a'n No.1 ni thei album pali nei ta

American singer Justin Timberlake chuan Man of the Woods album hmangin Billboard 200 Album Chart-ah pakhatna a hauh a, No. 1 ni thei album pali a neihna a ni ta. Man of the Woods album hi kar liam ta chhung khan US-ah ringawt copy 293,000 hralh chhuah a ni. 

Timberlake hian album panga a tichhuak tawh a, a thar ber Man of the Woods hi February 2 khan tlangzarh a ni. He album hi Taylor Swift album 'Reputation' tih chhuah hnua, album chhuak leh zinga kar khat chhunga hralh kal ber a ni. Swift hian nikum November thla khan Reputation hi a tichhuak a, US-ah ringawt pawh copy maktaduai 1.24 vel zet hralh chhuah a ni. 

Timberlake hian record duhawm tak a nei mek a, a album tihchhuah tawhte hi Billboard chart-ah dinhmun sang tak an luah phak vek a ni. Man of the Woods  hma hian October 2013 khan 'The 20/20 Experience' a tlangzarh a, hei pawh hi chart-ah pakhatna a ni. Kum 2006-a tichhuah FutureSex/LoveSounds tih loh a dang zawng chuan tlangzarh karah pakhatna an hauh phak vek a ni. 

Tun ṭum chart-ah hian Migos album 'Culture' chu hralh kal ber dawttu niin, copy 88,000 hralh a ni. Hun eng emaw chen pakhatna lo ni tawh  The Greatest Showman : The soundtrack chu pathumnaah awmin, copy 81,000 lai hralh chhuah a la ni. Hetih rual hian a tlak hniamna hi 15% a tling a, a hralh kal zualpui a reh ṭan niin a lang. Ed Sheeran album hit Divide chu hralh a la kal zui zel a, Grammy Award-a che ṭha tak Bruno Mars pawhin a album '24K Magic' a hlawhtlinpui zui zel. Top 10-ah hian Post Malone, Kendrick Lamar, Camila Cabello leh Lil Uzi Vert-te pawh an lang a ni. 



Share this Post

Login to comment
No Comments