Indian Film Festival Mizoram Hei hi a bul ṭanna chauh a ni - Rahul Bali

Mizoram sorkar nen ṭangho chunga Indian Film Festival Mizoram buatsaihtu Innovations India managing director Captain Rahul Bali chuan, "Hei hi a bul ṭanna chauh a ni a, a tawpna tur a ni lo. Mizoram sorkarin thawhho zel min tiam tawh a, Mizoramah Film Festival kumtin kan huaihawt ang," tiin a sawi.

Nimin khan Convention Centre, Beraw-ah sawm bikte tan, Indian Film Festival hmang tura lokal film siamtute kawmna hun siam a ni a, Rahul Bali chuan, "Mizoram sorkar thawhpui an nuam a, mipuiten min dawngsawng ṭha bawk a, nuam kan ti hle a ni," a ti.

Vanglaini palaiin, "Mizoramah Bollywood movie hi release a la ni ve ang em?" tia a zawhna chu Innovations India CEO Rahul Bali chuan, "Engvangin nge a nih theih loh ang?" tiin Mizoram tan kawng a inhawn thu a sawi a; Film Festival neih nana Mizoram an thlan chhan chu, "A hmun a mawi a, midang hnena he hmun mawina pholan hi kan duh a ni," tiin a sawi bawk.

Bollywood producer lar leh Wave Cinema CEO ni bawk Rahul Mittra chuan, "Film tam tak kan lo siam tawh a, kan hlawhtlinna miin min zawh a pianga ka chhanna chu 'A changtute lam pawh a ni lo, film kan channa hmun vang zawk a ni' tiin ka sawi ṭhin. Kan film siam chu a hmun hma nen a inmil a ngai a, a hmunin mipui a hip a ngai. Chutianga mipui hip tur chuan Mizoram hi a mawi tawk a ni," a ti.

Film lar tak tak Saheb Biwi aur Gangster, Saheb Biwi aur Gangster returns, Bullett Raja, Revolver Rani leh Sarkar 3 producer chuan, "Kan film siam nana Mizoram kan hman chuan film dang siamtu tam tak pawhin an rawn pan ruih ruih mai ang. Kyrgyzstan-ah a vawi khat nan Bollywood movie shooting kan nei a, a hnu lawkah film 27 chuang an shoot ve lehnghal a ni," a ti a, Bollywood film siamtute Mizorama film siam tura an lokal chuan tualchhung mite tan pawh eizawnna kawng a inhawn theih thu a sawi bawk.

Bollywood hit tling pha 'Oh My God' director Umesh Shukla chuan, "Mizoramah hian film kan la rawn siam ngei ang tih ka tiam ngam," a ti a, Vanglaini palaiin a titi puinaah, "Mizoramah hian film siam ngei ka duh a, mah se a ram hi fankual ve phawt pawh ka duh ang. Chutihrualin thawnthu ngaihnawm leh ṭha, filma siam theih tur ka mamawh dawn a ni," tiin Mizo mipui te thawhpuiah a sawm a, Mizorama film a siam chuan a ram mipuite nena inzawmna nei thawnthu ngei ni se a duh thu a sawi bawk. 



Share this Post

Login to comment
No Comments