Grammy Award 2018 Zaithiam inlan tur an hrawl

Kum tina sem ṭhian Grammy Award chu a vawi 60 nan January 28 hian New York khawpuiah sem a ni leh tawh dawn a, he hunah hian zaithiamte zingah tute nge inlan dawn tih chu hriat a chakawm tawh hle a ni. Award semnaa inlan tur hming hi eng emaw zat puan a lo ni tawh a, chung zingah chuan khawvel huapa hming lang pha chin an kat nuk mai. 

Tun hnai khan zaithiam inlan tur ṭhenkhat hming puan leh a ni a, chung zingah chuan Bruno Mars, Cardi B, Luis Fonsi, Daddy Yankee leh Kesha-te pawh an tel. Bruno Mars leh Cardi B-te hi an perform dun dawn a, tun hnaia an hla tihchhuah thar 'Finesse' an sa dawn a ni. Ngaihven hlawh ber tur zinga mi chu Puerto Rican singer Luis Fonsi leh Daddy Yankee-te an ni. 'Despacito' hla lar zia sawi nawn a ngai lo a, Luis leh Daddy perform dun tur hian boruak a nei lian hle reng a ni. Childish Gambino, Lady Gaga, Little Big Town, Patti LuPone, Pink leh Ben Platt-te chu Grammy Award-ah hian an inlan dawn tih a chiang tawh bawk. 

Grammy Award hian ngaihhlut a hlawh ṭhin em avangin zaithiamte tan chuan he huna perform hi chawimawina ropui tak a ni ngei ang. Award dawngtute pawhin an ngaihlu ṭhin hle a, tun ṭumah pawh hian award dawng thei tur hming puan a nih aṭang khan boruak a lian nghal hle a ni. JAY Z leh Kendrick Lamar-te chu award dawng thei tura chawpchhuah zingah an langsar hle a, award paruk hui thei dinhmunah an ding mek. Hetih lai hian Bruno Mars pawh award ngaihhlut hlawh 'Album of the Year', 'Best R&B Album' leh 'Song of the Year' dawng thei turin a dinhmun a ṭha viau bawk. 

Bruno Mars nena perform dun tur Cardi B pawh a ṭum khatna atan Grammy Award dawng thei tur zingah a tel a, a hla hit 'Bodak Yellow (Money Moves)' hmangin 'Best rap Performance' leh 'Best Rap Song' award dawng thei tur zingah a tel a ni. American R&B singer SZA pawh a ṭum khat nan nominee zingah a tel a, 'Best new Artist', 'Best R&B Performance', 'Best R&B Song', 'Best urban contemporary album' leh 'Best rap/sung performance' dawng thei turin a dinhmun a ṭha viau bawk.

Latin Grammy Award-a chawimawina eng emaw zat lo humhaw tawh Luis Fonsi leh Daddy Yankee-te chu award dawng thei tura hming langsar an ni bawk. An hla hit 'Despacito' chu 'Song of the Year' ni thei tura ngaih niin, he hla vek Justin Bieber tela an sakna chu 'Best duo/group performance' award dawngthei tura chawpchhuah a ni bawk. 

Grammy Award hi television host James Corden chuan a host dawn a ni. 



Share this Post

Login to comment
No Comments