India mite thihpui tam ber boruak bawlhhlawh!

Delhi khawpui boruak chhiat ziain sawi a hlawh a, mipui leh mithiamte an mangang! India ram hrim hrim hi khawvelah pawh boruak nei thianghlim lo zinga mi a ni a, hei vang hian thih hun hmaa thih phah pawh an tam hle.

Centre for Science & Environment (CSE)-in a tarlan dan chuan, mihringin kan thih hun pangngai, kan dam hun chhung tur kum kan dam phak lohna chhan tam tak a awm a, chung zinga chhan lian ber chu boruak bawlhhlawh hi a ni an ti. India mite hi kum 68.35 dam tura ngaih kan nih laiin, hemi dam thleng loa thihna thlentu thil chi hrang hrang a awm a, chung zinga thawhhlawk ber chu boruak bawlhhlawh hi a ni.

CSE-in a tarlan dan chuan India mi tam takten an dam hun chhung tur ang dam thleng loa an thihpui zingah thau lutukna te, rilru lam hrisel lohna te, cancer leh lung natna hrang hrangte chu awm bawk mah se, boruak bawlhhlawh hi kan tuar ber a ni an ti. India mi, kum 68.35 dam thleng loa thi zinga za zela 30 ngawt hi boruak bawlhhlawh vang a nih thu, CSE chuan a tarlang.

CSE-in Body Burden a tihchhuahah chuan hetiang hian a inziak, "India rama thihna zaa 61 ngawt hi nunphung emaw, inkaichhawn theih loh chi (non-communicable) natna vang a ni a...kum 2020 khi chuan kum tin cancer vei hmuhchhuah thar hi maktaduai 1.73 chuang an nih tawh a rinawm. Hetiang zat a tlin chhoh theihna chhan tur hrang hrang zingah hian boruak bawlhhlawh, vaihlo, zu leh ei leh in thlak te a ni ang," a ti. Report-a a landan chuan dam hun chhung tur zat beisei, dam pha loa thihna za zela 30 hi boruak bawlhhlawh vang a ni a, chu mai bakah boruak bawlhhlawh leh rilru lam natna hian inzawmna a nei tih hmuhchhuah a nih thu a tarlang bawk.

Body Burden hian India chu khawvel ram hrang hrang zinga zunthlum leh a kaihhnawih tamna ber dawttu a nih thu a tarlang bawk a, environment risk factor-te hi ngaihthah a nih a, kawng ṭha lam zawh tuma hmalakna a awm lo a nih chuan India hi tihdam theih rual a ni lo ang a ti bawk.



Share this Post

Login to comment
No Comments