Cristiano-a'n fa pali a nei ta!

Footballer lar Cristiano Ronaldo chuan fa pali a nei tling ta a, Pathianni khan a bialnu Georgina Rodriguez chuan fanu a hrin sak. 

An fanu hming hi Alana Martina niin, Hospital Quiron Universal, Madrid-ah a piang. Martina hma hian phir Eva Maria leh Mateo te bakah Cristiano Ronaldo Jr. a lo nei tawh bawk. Kum 32 mi Ronaldo hian nupui nei si loin fa pali zet a nei tawh a ni.

Tuna a kawppui Georgina Rodriguez hi Spanish model niin, kum 22 mi lek a la ni. Kum khat chuang awrh chauh an la inzui a, mahse tunah chuan fanu duhawm tak an nei der tawh. Ronaldo hian June thla lawk khan fa phir a lo nei tawh a, mahse Surrogate Baby an tih, mipa chi lak chhuah aṭanga nau piantir an ni thung. 

Cristiano hian a fanu thar Alana Martina, a kawppui Rodriguez leh a fa hmasa ber Ronaldo, Jr. te nena an lanna thalak chu social media lamah a tarlang a, hun rei loteah a darh nghal chuai chuai a ni. Naute hi November 21 vela neih an inbeisei a, mahse a hun hmain an nei ta a ni. Ronaldo hian tun hnai khan Football chawimawina sang FIFA 'Player of the Year' award a dawng zo chauh a, tunah lawmnan dangin a zui leh ta a ni. 



Share this Post

Login to comment
No Comments