Liam Payne-a’n 1D reunion tihmâkmawh niin a ngai tlat!

Zaithiam lar ṭhenkhatte pawhin One Direction hi inzawmkhawm leh se an duhpui a, anmahni zinga mi ngei Liam Payne pawhin One Direction chu inzawmkhawm leh ngei ngei a ṭul niin a ngai.

Liam Payne chuan kum 2015-a album an tihchhuah ‘Made in the AM’ avang khan inzawmkhawm leh hi tihmâkmawh niin a hria. Kha album an tihchhuah hnuah khan tour mumal an nei hman ta mang lo a, hei vang hian Liam hian inzawmkhawm hi ṭul a ti hle. Kum 2015 tawp lam khan Niall Horan, Louis Tomlinson leh Harry Styles te chuan hun eng emaw chhung atan One Direction anga an chethona chu chawlhsan an tum thu an puan zui mai avang khan tour hi an nei mumal ta lo a ni.

Liam chuan, “Nakin lawkah khi chuan kan inzawmkhawm leh hi a ṭul a, a ngai a ni. Ka tihchhan chu tour pawh kan tour-pui hman loh album kan la nei a, chu bakah chuan ka ṭhian dangte nena hla phuah chak deuh deuh ka nei nual tawh bawk,” a ti.

Tour an neih tawh chung­chang a sawi chhuak a, a lung a leng deuh a ni. “Tour kan neih tawh zawng zawnga ngaihawm ka tih leh nuam ka tih ber chu kan la naupan zual lai deuha mi kha a ni. Tour bus-ah hun hlimawm tak kan hmang tlang a ni. America-a tour kan neih hmasak berah phei kha chuan kan la tê a, kan bus pawh a tê. Hun hlimawm, theihnghilh tawh loh tur hlir kan tawng niin ka hria,” a ti.



Share this Post

Login to comment
No Comments