Kylie Jenner A cosmetic range a hlawhtlinpui

Kardashian-Jenner chhungkuaah chuan Kylie Jenner hi a kalna kawngah a hlawhtling ber zinga mi a ni ta ber e. Kum naupang tak a la nih laiin mi hausa tawntaw a ni ti tih nghal dawn der mai.

Kylie Jenner hian cosmetic range a kalpui hnuah hlawhtlinna a hmu a, a range hi a hlawhtling zel a, tunah chuan USD mtd 420 zet he range hian a thawk chhuak ta der mai. Reiloteah a sumdawnna hian USD tluklehding­awn a tlin chhoh thuai rin a ni.

Kylie hian a cosmetic range hi kum 2015 November thla aṭanga a kalpui ṭan a ni a, Lip Kits leh eyeshadow chi hrang hrangte a tichhuak. A sumdawnna bul a ṭan aṭanga thla 18 chhung lekin retail-a a hralh chhuahna ringawt hian USD mtd 420 a tling ta hial. Kumin chhung ringawt pawhin a sumdawnna pawh a ṭhang nasa hle a, a hma khan USD mtd 386 zet a thawk chhuak tawh a, tunah chuan a din tirh aṭanga sum a lakluh zawng zawng hi USD mtd 420-ah kai chhoin a hma aia a punna hi zaa 25 zet a tling.

A bul ṭan nan Kylie hian lipstick shade chi thum a tichhuak a, second reilote chhungin a zo nghal vek a nih kha. A hlawhtling chho zel a, tunah chuan lip kits lam chauh ni tawh loin clothing line lamah thlengin a sumdawnna a zauh.

A hlawhtlinna leh hausakna hi an chhungkuaa innghat a la ni a, a nu Kris Jenner mai bakah a laizawn, Kim, Kourtney, Khloe leh Kendall te nen an hausakna hi a la inzawm a tih theih ang. Kum hnih kalta khan E! nen an chhungkua hian inremna an siam a, hetah hian an chhungkua hian USD mtd 70 an hlawh a, chuta ṭang chuan Kylie hian Keeping Up With the Kardashian episode tinah USD 4,000 a hlawh ve ziah a ni.

Kylie tan sum lamah chuan a hmalam a la êng rih khawp mai. A clothing line Topshop hian ngaihven a hlawh a, he line hi a laizawn Kendall nena an kalpui a ni. Chu mai bakah model a ni a, modelling industry aṭangin sum a lalut zel a, reality TV show a nei dawn bawk. Kum 20 mi Kylie hi nakin lawkah chuan kum 30 hnuai lam hausa berte zingah a lang thuai ang a, nikuma Forbes-in ‘30 Under 30’ a tihchhuahah pawh khan a hming a lang tawh a ni.



Share this Post

Login to comment
No Comments