Kum hnih hnuah Hmingtea Dance video hmuhnawm

Mizo Idol aṬanga kan hriat lar leh zaithiam, Hmingtea Chhangte chuan kum hnih teh meuh mai music video a tihchhuah tawh loh hnuah dance music video ngei mai kan hmu ta. Hmingtea music video thar hi 'Hun Duhawm leh Lenrualte Dance Version' a ni a, Alan Rinawma leh Zuala Hmar choreograph niin, YouTube-ah pawh dah chhuah a ni tawh.

Kum hnih zet mai Hmingtea hi music dawhsanah thil thar nen kan hmu ta lo a, tunah kan hmu ve chauh mai. Hmingtea hian Mizoram University-ah M.A. (Mass Communication) a zir avang­in music lam hi a buaipui hman meuh lo a, zirna lama a inthlurbing ngar ngar rih a, tunhnai khan a zirlai hi a zo a, video thar pawh kan hmu nghal ta a ni.

'Hun Duhawm leh Lenrualte Dance Version' hi nikum November 26-a shoot daih tawh kha a ni a, official music video tur nghah phawt a ni a, mahse buaina hrang hrang avanga official music video tur zawk zawh a la nih loh avangin dance version hi tihchhuah a ni ta a ni. Official music video tur hi kumin kum tawp lamah chuan tihchhuah tum a ni. Dance version-ah Mizo Dance Camp kan hmu a, lâm hmuhnawm tak leh zai ngaihnawm tak a awm.

'Hun Duhawm leh Lenrualte' tih hla hi RPA music siam a ni a, Hmingtea nen hian feature-in, a hla hi ngaihthlak a nuam a, a hla thu pawh hlimawm tak a ni a. Ṭhiante nena hlim taka inkawmkhawm nawmzia leh, hlim leh nui hmel put mawizia rawn sawina hla a ni ber. Dance version hi Alan Rinawma YouTube channel-ah dah chhuah a ni. A video hi manequin challenge-a ṭan a ni a, a lâm dan step pawh hi har si lo, nalh si a ni.



Share this Post

Login to comment
No Comments