Thla insiam danah ngaihdan thar

Lei kal hual veltu, zan lama roreltu thla insiam danah ngaihdan thar a rawn chhuak a, mithiam tam tak chuan pawmawm an ti viau.

Rehovot-a Weizmann Institute of Science-a mi, Raluca Rufu leh a thawhpuiin thla insiam dan chungchanga an zirna thu hi Nature Geoscience-ah an tichhuak. A hmaa thla insiam dana mithiamte ngaihdan chu leilung insiam ṭan chhoah Mars ang tiat vel planet pakhatin kan lei a rawn su a, a su hêk hlawih mai a, chu a hêk chu thla hi a ni ta a ni.

Tuna ngaihdan thar an rawn tihchhuahah hi chuan thil lian tak pakhatin lei a rawn sut hêk hlawih aṭanga insiam ni mai loin, van lam thil hrang hrangin lei a sut them inhlawmkhawm aṭanga insiam ta a ni an ti.

Rufu leh a thawhpui­te chuan thla insiam dan chungchang zir hian computer hmangin vawi tam tak an enchhin a, chuta ṭang chuan ngaihdan thar hi an rawn tichhuak. An ngaihdan chuan thla tê (moonlet) 20 velin tuna kan thla hi an siam nia ngaih a ni.

Scientist te chuan kan Solar System hi kum tluklehdingawn 4.6 vela upa niin an sawi a, hemi hnu, kum maktaduai 100 a liam lehah thla hi a insiam niin an ngai.



Share this Post

Login to comment
No Comments