Drake leh Future an inkawp fuh

Nikum chhunga album hralh hnem ber chu ‘Views’ a ni tih aṭang ringawt pawh hian Drake-a telna tour hi a hlawhtlin loh a rinawm loh viau. A album hralh a kal mai piah lamah hip-hop lama hlawhtling Future nen an inkawp a, an inkawp fuh viau a ni, an pa­hniha tour an neih chu hip-hop huang chhunga tour hlawhtling ber a ni.

Poll Star Pro-in a tarlanah chuan Drake leh Future tena tour an neih dun ‘Summer Sixteen’ tour, nikum chhunga tour an neih chuan, tunhmaa hip-hop lama mi ropuite tour hlawhtling an lo tih ṭhin a rawn khum hneh hle. Hip-hop tour hlawhtling berah ‘Summer Sixteen’ hi puan a ni a, Jay-Z leh midangte an tluk lo.

Hip-hop tour hlawhtling ber ṭhin chu Jay-Z leh Kanye West te inkawpin kum 2011 October aṭanga kum 2012 June thlenga tour an neih ‘Watch the throne’ kha a ni a, kha tour-ah khan USD mtd 75.6 zet an lalut. He record hi Drake leh Future te hian rawn khûmin, nikum chhunga tour an neihah USD mtd 84.3 zet an lalut thung. ‘Watch the throne’ tour khan ni 63 a awh a, ‘Summer Sixteen’ tour thung hi chu ni 54 chhung chauh a ni.

Hip-hop huang chhung­a tour neih tawha hlawhtling berah ‘Summer Sixteen’ tour hi puang mah se, nikum chhunga sum lalut hnem tour-ah chuan 11-na chauh a ni thung. Kum 2016 chhunga tour aṭanga sum lalut hnem ber chu Bruce Springteen leh The E Street Band te kha an ni a, show vawi 66 an nei a, USD mtd 268.3 zet an lalut. Tour hlawhtling pa­hnihna, nikum chhungah chuan Beyonce Knowles ‘Formation’ tour kha a ni a, USD mtd 256.2 lalut­in, pathumna chu Coldplay tour ‘A head full of Dreams’ a ni a, USD mtd 241 a lalut.



Share this Post

Login to comment
No Comments