LAC-ah zirna chhunzawm thei lo mtd 137 chuang awm

Thla sarih chuang zet  Covid-19 hri lengin khawvel a tibuai tawh a, hripui  leng vang hian Latin America and the Caribbean (LAC)-a naupang zirlai maktaduai 137 chuangin an zirna chu tun thlengin an la chhunzawm thei lo tih United Nations Children's Fund (UNICEF) chuan a tarlang.

Latin America and the Caribbean-a hri leng vanga zirna la chhunzawm thei lo hi zirlai awm zat aṭanga 97% an tling pha a ni. 

Ram ṭhenkhatah chuan school-te chu hawn chhoh ṭan a ni tawh a, mahse Covid-19 hri len vangin dan pangngai ang chuan an la kal thei chuang lo. LAC-ah hian Covid-19 hri kai hi mi mtd 11 an chuang tawh a, hei vang hian zirnain hi an la hawng ve lo a ni.

UNICEF-in data a tih­chhuah thar berah hian LAC-a naupang zirna dawng lo hi 4% aṭanga 8% ah a pun chhoh thu sawiin, naupang zirna dawng lo hi mtd 3 vela an pun thu  a tarlang. Hengte avang hian zirna lama harsatna an neih chhoh phah dawn niin UNICEF chuan a tarlang bawk.

Covid-19 hri leng vanga kumin kumtir aṭanga zirna in khar a nih vang hian LAC-ah hian UNICEF chuan theihtawpin hma a la mek a, naupang zirlai mtd 42-te tan inlam aṭanga zirna an chhunzawm theih nan radio, TV, internet leh thil dang hmangin zirna an dawn theih dan tur a ngaihtuahpui mek a ni.

Heng bakah hian UNICEF chuan school hawn a nih leh huna zirlaite an hrisel ṭhat nan leh quality education an dawn theih nan hma a la bawk. School tina tui an neih ṭhat theih nan hma a la mek a, zirtir­tute training neih pui te, sanitation leh kawng dang dangah UNICEF chuan hma a la mek a ni.