Tennis chawlh hun an pawt sei Clay court season awm dawn lo!

Mipa leh hmeichhe tennis thuneitu sang Association of Tennis Professionals (ATP) leh Women's Tennis Association (WTA) te chuan chawlh an puan tawh chu June 7 thleng atan an pawt sei a, tun season atan clay court inelna an nei dawn lo tihna a ni.

Clay court inelna awm dawn lo mah se French Open erawh September thla atan an lo sawn hla lawk tawh. Paris khawpuia tournament hi tun season bikah chuan clay-a an khelh awmchhun a ni dawn. Chawlh hun pawh sei a nih avang hian - Madrid, Rome, Strasbourg, Rabat, Munich, Estoril, Geneva leh Lyon-ah te mipa leh hmeichhe inelna a awm thei dawn lo. Mimal inelna bakah hian ram leh ram inkhelh pawh tihtawp vek a ni.

Coronavirus vangin tennis hi April 27 thleng chawlh lailawk a nih thu an puang tawh, a hnuah WTA chuan May 2 atan an pawt sei. Tuna thu thar berah chuan ATP leh WTA te hian June 7 thleng atan an pawt sei leh ta zawk.

ATP leh WTA chuan thuchhuah siamin, "Tun hi ngaihdan hran lo neih hun a ni lo, inlungrual taka zai khat vuana kal hun a ni. Covid-19 buaina hi kan zavaia kan dolet a ṭul a, chumi tur chuan thil liam tham huaihawt loh hi kan tih tur pawimawh hmasa a ni.

"Hri leng vanga thutlukna harsa tak tak kan siamte hi sumdawna lama kan thawhpuite nen sawiho ṭhin a ni a, anni lam pawhin min hrethiam hle. ATP, WTA, International Tennis Federation, All England Lawn Tennis Club, Tennis Australia leh United States Tennis Association te chuan uluk takin tennis hma hun a ngaihtuah a ni," an ti.

Beisei anga hri leng a kian hunah chuan tennis inelna pawh an khel leh ang. June 7 thleng an chawl a nih chuan WTA chuan Nottingham-ah inelna an ṭan nghal thei dawn, Queen's Club lamah pawh June 15 aṭangin an inkhel zui nghal ang - inelnate hi Wimbledon inbuatsaihna a ni nghal ang.

Grass court inelna lian Wim-bledon hi June 29 aṭanga July 12 chhunga khelh tur a ni dawn. Europe-ah hri leng a darh mek a, reh lam a pan lo a nih chuan an chawlh hun chhung pawh hi tih sei a la ngai leh hial mai thei.

International Tennis Fede-ration (ITF) chuan tournament a awm loh chhung hian world ranking chu tih danglam a nih loh tur thu an ti chiang tawh bawk. Player ṭhenkhat tan channa a nih theih laiin hliam vanga chawl mek tan erawh chanchin lawmawm a ni thei ang.