KHAWTHLIR

Mizorama Covid-19 positive hmuh chhuah tawh mi 3,156 zingah Mizoram chhunga kái chhâwng mi 1,390 an awm tawh a, mi 1,766 chu state páwn aṭanga rawn lut an ni thung. Mizorama hripui vei hmasa ber chu Guwahati Medical College-a hmuh a ni a; ZMC laboratory-ah mi 2,155, TrueNAT-PCR hmangin mi 423 leh RAT hmangin mi 577 hmuh chhuah a ni.

Kolasib DC Dr H Lalthangliana  chuan nimin khan Bilkhawthlir leh Kolasib-a Border Security Force (BSF)-te awmna hmun chu containment area-ah a a puang. Containment area-te chu - Kolasib Diakkawn M/S-I leh RSTC Boys Hostel, Bilkhawthlir M/S-III leh Bilkhawthlir P/S-IV leh sikul huam chhungte a ni.

Mizoram Kohhran Hruaitute Committee (MKHC) chuan November 15, Pathianni zan khian ramria buaina leh hripui léng chungchangah ram pum huapa ṭawngṭai rual an huaihawt dawn. Ṭawngṭai rual hi Pathianni zan dar 6:30-ah ṭan tur niin, TV-ah live programme-in kaihhruai a ni dawn a; MKHC chuan lo zawm ve tur leh ṭhahnemngai taka ṭawngṭai turin mi tin an ngen a ni.

Kumin February thla aṭanga nimin tlai dar 4 thleng khan Mizoram aṭangin swab sample 1,24,730 endik a ni tawh. Zoram Medical College Covid-19 Laboratory-ah sample 72,198 endik a ni tawh a, chu'ng aṭang chuan Covid-19 positive 2,155 hmuh chhuah tawh a ni. TrueNAT-PCR hmangin sample 8,198, Rapid Antigen Test hmangin sample 44,276 leh state páwnah sample 58 endik a ni tawh bawk.

State Referral Hospital ICU-ah Covid-19 vei mi paruk enkawl mek zel a ni a, an zinga pali chu ventilator hmanga enkawl niin, pahnih dang chu oxygen pek mek a ni tih, SRH-ZMC Bulletin-in a tarlang. SRH-ah hian nimin khan Covid-19 vei pakhat dah luh a ni a, ani nen mi 49 enkawl mek an ni. Mi 49 zinga 22 chu kum 60 chung lam an ni a; Isolation ward-a awm mi 43-te'n harsatna lian tham an nei lo.