Hripui donaah kan hneh theih nan I ṭang tlang zel ang u - Tawnluia

UDPA changtu deputy chief minister Tawnluia chuan nimin khan a pisaah kumin June aṭanga August chhunga hman tur ‘Mizoram chhung urban areas-a qua­rantine waste kalpui dan tur’ tih chu Mizorama khawpui (census town)-a hman turin a tlangzarh. Tawnluia chuan, hripui donaah hnehtu ni turin ṭan rual zel a pawimawh thu a sawi.

Dy CM chuan, Mizoram leh khawvelin hun khirh tak a tawh mekah Mizoram sorkarin a tum ber chu Covid-19 laka mipui  dam khawchhuahna a nih thu a sawi a, "He hun khirh tak kan paltlang theihna turin sorkar, kohhran, tlawmngai pawl leh mipui ṭan rual zel a pawimawh. Hripui donaah hnehtu kan nih theih nan i ṭang tlang zel ang u," a ti.

UDPA department-in tun hma aṭangin bawlhhlawh sâwngbawltute himna turin kawng tam takin hma lak ṭhin a nih thu sawiin, "Hripui léng karah Mizoram sorkarin theihtawpin bawlhhlawh sâwngbawltute himna tura inven theihna kawng hrang hrang a ngaihtuah reng a ni," a ti a; Swachh Bharat Mission (Urban) kaltlangin invenna tur ngaihtuah a nih thu a sawi.

Khawpui (census town) 23-a bawlhhlawh sâwngbawltute tan June-August chhung tla tur invenna tur hmanrua - hmai tuam­na, kutkawr, PPE, pheikhawk tuamna leh kut tihfaina (hand sanitizer)-te pek a ni a; quarantine facility-a hman tur bika duan bawlhhlawh ip eng (yellow) pawh khaw 23-a quarantine centre awmna zawng zawnga hman turin rua­hman a ni bawk.