Kolasib dist-ah mi 530 inkhung mek
Kolasib district-a quarantine facility-ah mi 530 an awm mek a, awm thei zat tura ruahman aṭangin mi 170 vel an la lenga ngaih a ni. An district-ah hian endik turin mi 871-te swab sample lâk a ni tawh a, Covid-19 vei mi 41 enkawl theihna tur hmun buatsaih a ni bawk.
Kolasib DC Dr H Lalthlangliana'n nimina DC conference hall-a meeting-a a sawi danin, quarantine facility-a awmte'n facility enkawltute kaltlangin an mamawh zualte an lamtir phal a ni a, mahse, pawisa fai a inpek a theih loh a, online banking hmanga inpek tur a ni. Mahni ina inkhung hran (home quarantine) kalpui an tum lo.
Dr H Lalthlangliana chuan, Kolasib district-a quarantine facility-a awm mekte leh state páwna tangkhang haw buaipuitute swab sample lak vek a nih tawh thu a sawi a; tun hnaia state páwn aṭanga haw zinga Kolasib district mite chuan khaw chhung rap loin, quarantine facility-ah dah nghal zel a nih thu sawiin, "Intlawh leh thil inpekte chu quarantine facility enkawltute phalna la lo chuan phal a ni lo," a ti.
Kolasib Bawrhsap chuan, quarantine facility-a awmte ei leh in leh an mamawh zualte pek ṭhin a nih thu sawiin, "Mi inphal ṭhenkhatte aṭangin pawisa leh ei turte dawn ṭhin a ni," a ti a; quarantine-a awmte zingah an awm chhung ei leh in senso intum an awm mek thu a sawi bawk.