District-ah inkhàrkhip kaihhruaina siam

Mizoramah, khawpui leh containment area bikah total lockdown kalpui ṭan a ni a; district khawpui ṭhenkhatah Mizoram sorkarin inkaih­hruaina a siam chu a nih ang anga zawm a nih laiin, district khawpui ṭhenkhatah chuan inkaihhruaina siam a ni a, dawr inhawng pawh tam tak a awm.

SERCHHIP: Serchhip DC Dr Lalzir­mawia Chhangte chuan Mizorama inkhàrkhip (total lockdown) kalpui ṭan chung­changah nimin khan hriattirna a chhuah a; June 9-22, 2020 chhunga total lockdown laia inkaihhruaina Mizoram sorkar­in a chhuahte chu Serchhip district-ah hman nghal vek tur a nih thu a tarlang. "Sorkar order behchhana Serchhip district tan bik inkaih­hruaina siam a nih hma chuan state sorkar thu­chhuah hi chhuah a nih ang hian tidanglam loin zawm tur a ni," a ti

Serchhip khawpui chhungah task force hrang hrangte chu an veng ṭheuhah hrui pawta duty leh tura beisei an ni a; feh turte tan task force aṭangin chhuah phalna lehkha lâk a ngai dawn a ni.

CHAMPHAI: Champhaiah chuan nimin khan district bawrhsap Maria CT Zuali hoin DC Conference Hall-ah sor­kar hotute leh pawl hrang hrang aiawhte'n total lockdown kalpui dan tur an rel a; Champhai SP Rex Zarzoliana, additional DC Mark Lalthanliana leh sorkar hotu dangte bakah, Champhaia VC hotu te, MJA, YMA leh AMFU aiawhte an tel.

Champhai District Task Force on Covid-19 chairman Maria CT Zuali, DC chuan, Mizoramah Covid-19 vei an pun avangin total lockdown puan a nih thu sawiin, Champhai district mipui chu lung­rual taka thawhopuiah a sáwm a, mahni mawhphurhna ṭheuhte hlen turin a chah.

SP Rex Zarzoliana Van­chhawng chuan, chhun lamah khawpui chhung hmun pakuaah police duty post siam a nih dawn thu leh patrolling team an awm tur thu a sawi a; dan leh thupekte zâwm turin mipui a ngen.

Champhaiah hian hmasawn nana hmalakna hnathawh leh mimal eizawnna hnathawhnate phalna lak ngai loa kalpui theih a ni a, mi panga aia tam awm khawm phal a ni lo. Bazarpui chu khâr tur a ni a, VC-te'n an huam chhungah a hranpain chawhmeh bazar an siam thei a; zing dar 8 aṭanga tlai dar 5 inkarah Thawhlehni, Ni­ngani leh Inrinni-ah eichawp dawr, in sakna bungraw dawr leh electric bungraw dawrte hawn theih niin, Thawhṭanni, Nilaini leh Zirtawpni-ah a chunga tarlan bak dawr dang zawng hawn theih a ni.

Mahni venga task force phalna lain feh phal a ni a, fehnaah silai leh nungcha tihhlumna hmanrua ken phal a ni lo. Task force duty-naah mi panga aia tam duty lo tura tih a ni bawk.

KOLASIB: Kolasib-ah pawh bawrhsap Dr H Lalthlangliana hoin DC Confe­rence Hall-ah total lockdown kalpui dan tur an rél a, sorkar official te, Kolasib district-a VC leh Joint VTF hruaitute an tel a ni.

KHAWZAWL: Khawzawl District Task Force on Covid 19 pawh nimin khan an chairman H Lianzela, DC hoin an ṭhukhawm a, inkharkhip kalpui dan tur an rél. Khawzawl district-ah hian quarantine facility leh isolation facility-a khung hran mek mi 199 an awm.

Khawzawlah hian mipui ni tin mamawhte chu ni tin zing dar 7 aṭanga chhun dar 12 thleng hawn turin an rel a, dawr dang zawng chu khar tur a ni. Thlaite chu task force-te enpuinain mahni kawtkaia zawrh phal ni se, an ti. District chhunga khaw lian deuh dangah chuan sorkar thu­chhuak zúlzuiin an khaw tana him ber tura an ngaiha kal turin task force-te an hriattir a ni.