SBI Foundation-in PPE set 600 Mizoram sorkar hnenah an hlân

SBI Foundation chuan nimin khan Mizoram sor­kar hnenah personal protective equipment (PPE) full set 600 an pe a, sorkar aiawhin Health & Fa­mily Welfare minister Dr R Lalthang­liana'n a dawng.

PPE hlannaah hian Dr R Lalthangliana chuan, Chief Minister-in Co­vid-19 donaah mamawh hrang hrang a ngaih pawimawh thu sawiin, "Health department-in mamawh kan thlente hnâwl awm loin min pe zel. Khawvel pumin he thil hi a vawi khatna atan kan hma­chhawn a, a tìr aṭangin tu mahin boruak awm dan tur an sawi thei lo a, felfai taka ruahmanna pawh siam hleih theih a ni lo chungin zawi zawiin boruak inher ang zela ngaihtuah a ngai," a ti.

SBI regional mana­ger LP Lalchangkima chuan, PPE chu SBI Foundation kaltlanga pek a nih thu sawiin, "CSR kaltlangin Mizoramin a mamawh ṭul dang ventilator leh thil dang pekna tur cheng nuai 130 hû man pawh head office lamah thawn mek a ni," a ti a; CSR kaltlanga an thil dil chu a hlawhtlin ngei an beisei thu a sawi.

PPE set khat zelah hian mask pahnih, face shield, mit venna (goggles), kutkawr, suit leh a paihna tur bag a awm a, pakhat Rs. 1,990 man a ni.