Inkhàrkhip tìr lam aiin a tàwp lamah Boruak bawlhhlawh a lêtin a pung

Mizoram Pollution Control Board (MPCB)-in Mizoram hmun ṭhenkhata boruak bawlhhlawh dan an endikna, Air Quality Index (AQI)-ah inkhàrkhip thawh thumna leh thawh lina chhungin lirthei veivâk leh traffic jam tamna hmun Dawrpui Vengah boruak bawlhhlawh dan a lêtin a pung a, mihring hriselna atana hlauhawm erawh a ni lo.

Covid-19 vanga inkhàr­khip thawh khatna leh thawh hnihna (March 23 - April 14, 2020) chhung­­in páwna chhuah khap a ni a, phalna nei tlem tê bak lirthei hmangin an chhuakvâk lo. Inkhàrkhip thawh thumna leh thawh lina (May 4 - 27) chhung erawh chuan inkhàrkhip thlahdul hret a ni a; lirthei number-a odd-even number hmangin tlan chhuah phal a ni a, Pathianniah erawh chuan phalna nei lo tan chhuah phal a ni lo.

MPCB tarlan dan­in, inkhàrkhip thawh khatna leh thawh hnihna chhungin boruak dinhmun an tehna hmun hrang hrangah boruak a thianghlim a, bawlhhlawh léng vel a tlem. Inkhàrkhip thawh thumna leh thawh linaah lirthei chhuah phal ni tawh mah se, Mizoram hmun hrang hranga thli leh ruah thawk nasain boruaka bawlhhlawh nâwi léng vel a tiziaawm a, tehna hmun hrang hranga a lan danin, boruak bawlhhlawh a danglam lutuk lo.

Aizawla lirthei veivâk leh traffic jam thlen tamna hmun Dawrpuiah chuan inkhàrkhip thawh khatna leh thawh hnihna chhung­a boruak bawlhhlawh dan tehna AQI chawhrual (average) chu 22 a ni a, inkhàrkhip thawh thumna leh thawh linaah chuan 43-ah a kai chho.

Hetih lai hian, inkhàr­khip thawh thumna leh thawh linaah lirthei chhuak thei tawh mah se, hmun ṭhenkhatah chuan boruak bawlhhlawh dan a tlahniam thung a; a chhan chu - ruahsurin boruaka bawlhhlawh nâwi léng vel a tihziaawm vang a nih thu MPCB chuan an tarlang.

AQI sàn lama mihring hriselna a nghawng theih dan (associated health impact)-te chu: 0-50 in­karah harsatna thlen meuh lo a, 51-100 inkarah mi áwm ném deuh tan thâwk harsatna a thlen thei. AQI 101-200 inkarah chuap leh lung natna nei / lung ṭha lo te, naupang leh upa lam tan thâwk a tiharsa thei a, 201-300 inkarah rei tak hîp luhin thâwk a tiharsa a, 301-400 inkar­ah thâwkna kaihhnawih natna a thlen thei a, 401 chung lamah chuan mi hrisel pangngai pawhin an tuar tawh ṭhin.