Tangkhangte hruai haw hun tihchian theih a la ni rih lo

Covid-19 lêng leh inkharkhip vanga state páwna Mizo la tangkhang mek mi 2,000 velte hruai hawna turin rél ruahman a awm rih lo a, engtikah nge hruai haw an nih dawn tihchian theih a la ni rih lo.

Tangkhangte buaipuitu Task Group on Stranded Migrant Workers & Travellers-a State Nodal Officer hotute hnen aṭanga Vanglaini thu dawn danin, tunah hian Mizoram páwna Mizo tangkhang mi 2,000 vel an la awm a, Delhi-ah mi 1,300 vel an awm a, Tamil Nadu leh West Bengal-ah ṭhahnem tak an la awm bawk.

Mizorama total lockdown kalpui dan turah state páwna tangkhangte haw phal a nih thu tarlan a ni lo a; chutih rualin, sorkarin phalna a pek tawh, kawng laka thang mekte erawh chu Mizorama an luh phal a ni. Inkhàrkhip kalphung thar avang hian tangkhang mekte hruai haw theih hun tur hriat a ni lo. 

Tamil Nadu aṭanga thu dawn danin, rél hmang turin mi 1,500 vel tal tlin a ngai a, Mizoram sorkar lam inpeih loh avangin Tamil Nadu-a Mizo tangkhang mi 200 chuangte chu Manipur leh Tripura rualin hawtir hman a ni lo. An haw dan turah thu chiang a awm thei rih lo a ni.