Covid-19 vei mek 87 an awm ta Niminah mi 46 hmuh chhuah a ni
June 8, Thawhṭannia swab sample lak, Zoram Medical College (ZMC) Covid-19 Laboratory-a endikah Covid-19 vei mi 46 hmuh chhuah a ni. Heti hian nimin tlai dar 5 thleng khan Mizoramah Covid-19 hripui vei mi 88 awm tawhin, chu'ng zinga mi 87 chu vei mek an ni.
ZMC-State Referral Hospital (SRH) Covid-19 Bulletin, nimin tlai dar 5-a tihchhuahin a tarlan danin, Thawhṭannia khan ZMC Laboratory hian endik turin mi 459 swab sample an dawng a, nimin tlai dar 5 thleng khan mi 355-te result hriat tawh a ni. Mi 355 zinga mi 46 chuan Covid-19 an vei a, mi 309-in an vei lo thung.
Hripui vei hmuh thar mi 46 zinga mi 43 chu Lunglei district mi, khung hran mekte niin, mi pakhat chu Lawngtlai district mi a ni a, mi pahnih chu ZMC-a awm sa a ni thung a; anmahniah symptom a lang lo vek. Kum 18 leh 33 inkar an ni a, mipa 31 leh hmeichhia 15 an ni.
Covid-19 vei hmuh tharte hi - Delhi leh Noida aṭanga haw mi 23, Goa aṭanga haw mi paruk, Haryana aṭanga haw mi pali, Bangalore aṭanga haw mi pathum, Maharashtra, Punjab, Uttarakhand, Chhattisgarh leh West Bengal aṭanga haw mi pahnih ṭheuh an ni.
ZMC Laboratory-ah nimin khan mi 200 chuang swab sample endik a ni a, chu'ng zingah chuan Thawhṭannia endik hman loh eng emaw zat a tel a; zan lamah result hriat theih beisei ni mah se, he thu ziah lai hian kan hre hman lo.
State Referral Hospital-ah nimin khan hripui vei rinhlelh thilah mi panga dah luh thar an ni a; an zinga mi pali chu nimin khan an swab sample laka endik nghal niin, pakhat erawh chu vawiinah endik a ni ang.
ZMC Laboratory-ah hian June 1, 2020 zanah a ṭum khatna atan Covid-19 vei hmuh chhuah a ni a, chumi hnuah ni tin hripui vei hmuh chhuah belh a ni. Mizorama Covid-19 vei awm hmasa ber Rev. VL Hruaia Khiangte erawh chu ZMC-a laboratory a awm hma, Guwahati Medical College & Hospital-a hmuh chhuah a ni a, ani hi chu enkawl dam niin, May 9 khan damdawi-in aṭangin a chhuah tawh a ni.
SRH-ah hian Covid-19 vei mi 22 enkawl mek a ni a, mi 21 chu Isolation Ward-ah awmin, pakhat chu ICU-ah enkawl mek a ni. Isolation Ward-a awm zinga pahnih chuan khawsik sang vak lo an nei a, ngaihtuahawm erawh an ni lo a, mi dang zawng chuan insawiselna an nei lo.
SRH-ah hian rinhlelh thila dah luh leh damlo dang 14 an awm bawk a, Risk Ward-ah mi pakua, NICU-ah mi pahnih, Holding Ward-ah mi pathum leh MPW-ah mi 10 an awm a ni.
ZMC-a Covid-19
Vei hmuh tawh dan
Date Hmuh zat
June 1 12
June 2 1
June 3 3
June 4 5
June 5 2
June 6 10
June 7 8
June 8 46
TOTAL 87