LADC-ah BJP sorkar a pawimawh - Kiren Rijiju

Union Minister Sport & Minority Affairs minister Kiren Rijiju chuan Lai Autonomous District Council (LADC)-ah hmasawnna a luh theihna atan BJP an sorkar a pawimawh thu a sawi.

Kiren Rijiju hian LADC inthlan lo awm tur atana campaign tura lokalin, nimin khan Sangau leh Lawngtlai vantlang inkhawmah thu a sawi a, "LADC-a awmte hian hmasawnna ṭha zawk in mamawh a,development hian a nihna angin a rawn thleng pha ve lo che u. BJP-in sorkarna kan chang anih chuan thuneihna tam zawk inneih theih na turin hma kan la ang. Sum tam zawk central aṭangin in dawng anga, chumi hmang chuan development pawh nasa zawk leh ṭha zawkin LADC tan in thawk thei tawh dawn a ni," a ti.

6th Schedule Amendment Bill tihhlawhtlin a nih tur thu sawiin Kiren Rijiju chuan, "ADC tan hmasawnna hna thawh a awlsam leh zual dawn a, direct funding tur pawhin hma kan la ang. State sorkarin in sum dawn turte a hun taka an release theih ṭhin loh avangin vawi tam tak harsatna intawk a, a hun takah sum in dawn theih hi a pawimawh hle," a ti a, prime minister Narendra Modi leh kan hruaitu dangten an aiawhin LADC inthlan atana campaign tura an tirh thu a sawi.

Kiren Rijiju chuan Phawngpui Tlang (Blue Mountain) pawh eco tourism atan hmun pawimawh takah siam a nih tur thu sawiin, "Khualzin mi tam takin an tlawh theihna turin central puihnain hma kan la ang a, helai chheh vela khuate tan eizawnna kawngah pawh nasa takin a pui dawn a ni. LADC-ah hian BJP leh a thawhpuiten sorkarna kan siam anih chuan sports hmunpui siam a ni ang a, LADC sorkar thar lawm turin ka department chan aṭang mai bakah department dang aṭangin development package tam zawk nen ka rawn kal leh dawn," a ti.