Hrangthanga ruang buaipuitute Swab endik vat turin sorkar phût
ZPM Legislature Party (ZLP) leader Lalduhoma chuan, Police Training School (PTS), Thenzawla awm, Bihar Assembly inthlana duty zinga Covid-19 vei thi, R Hrangthanga ruang buaipuitute swab sample endik thuai turin sorkar a phût.
Lalduhoma hian nimin khan thuchah tichhuakin, PTS aṭanga Bihar inthlana duty tura kal mi 61 zingah mi 35-in hripui an kai thu a tarlang a, "An lo haw ní, November 12, 2020 aṭanga tun thleng hian vawi thum chauh test an la ni a, test apiangin hri kái an hmuh belh zel. Thawktute'n tesk kit indaih loh avanga test zung zung theih a nih loh thu an sawi," a ti.
Hripui vei vanga CCC aṭanga chhuak R Hrangthanga chu RAT test-ah a negative vanga chhuah a nih thu sawiin Duhoma chuan, "Vanduaithlak takin min boralsan a. An han test leh chuan a lo la positive reng tih hriat a ni," a ti a, Covid-19 avanga thi ngei a ni tih phat rual a nih loh thu a sawi.
Tunah PTS-ah R Hrangthanga ruang sâwngbâwltu, swab test hun nghak an la awm thu sawiin Lalduhoma chuan, "An zingah hian positive an awm ngei rin a ni. An vaia hri an kài hun hi sorkar hian a nghak em ni? Rang taka sorkarin a ngaihven loh chuan police leh an chhungte bakah, Serchhip bial mipui tan lungawi a har dawn a ni," a ti.
ZLP Leader sawi danin, RAT chu 50% chauh a rintlak tih mithiamte'n an sawi laiin, Mizoram sorkarin RAT-a negative-te a chhuahtir zel si avangin hri inkai darh a nasat phah tih phat chi a ni lo.