Champions League khelh hun tur a hriat loh
Europe khawmualpuia football thuneitu sang ber UEFA hnuaia ram 55 chu Nilaini khan an ṭhukhawm a, Coronavirus hri leng avanga chawlh mek Champions League leh Europa League chu thu leh awm hma chu khelh loh chhunzawm turin thu an rel.
Ram 55 inhmukhawm chuan June thlaa international match khelh tura ruahmanna awm sa zawng zawng ṭhulh vek pawh an rem ti a, heng zingah hian Euro 2020 khelh tur atana playoff match leh Women's Euro 2020 atana qualifying match te pawh a tel a ni.
Covid-19 in European football a luhchilh ṭantirh khan UEFA chuan Euro 2020 hi nakkuma khelh turin a lo sawn tawh a, nakkuma khelh tur a nih tho avangin playoff pawh sawn a ni ve leh ta.
UEFA hian May thlaa khelh tura ruahman sa vek Champions League, Europa League leh Women's Champions League final khelh hunte pawh a lo sawn tawh a, tun dinhmunah chuan European football kal zel dan tur hi hriatthiam a harsa hle.
European league zinga ngaihven hlawh bera chhal ngam Premier League chu April 30 thleng chawl tura ruahmanna siam lailawk a ni a, mahse vawiinah club an inhmuhkhawm dawn avangin thutlukna thar awm tura ngaih a ni.
UEFA president Aleksander Ceferin chuan June thla tawp tala European football chu chhunzawm leh a nih loh chuan tun season chu khel zo loa chawlhsan mai a ṭul mai theih thu a lo sawi tawh a, Premier League nomawi chawi tura match hnih chak bak mamawh tawh lo Liverpool fan-te tan chuan chanchin hriat nuam a ni lo ang.
Hetihlai hian Champions League leh Europa League chu hmun khatah khel zo mai tura sawi a awm bawk a, sawi ang hian an kal dawn a nih chuan quarterfinal chinah double leg awm loin hmun khatah tournament pakhat angin club-te an inkhel dawn tihna a ni.