Namaste Trump Event

Sabarmati Ashram aṭang hian a thusawina hmun tur, khawvela Cricket Stadium lian ber Motera-a Sardar Patel Stadium an pan zui nghal a, hetah hian Trump chuan mi nuai chuang hmaah thu a sawi a ni. He hunah hian prime minister Narendra Modi, union home minister Amit Shah, Gujarat CM Vijay Rupnai leh Governor Acharya Devvrat-te pawh an tel.

Motera Stadium-ah hian Modi leh Trump-te hi an inkuah leh a, a hmain Airport-ah inkuahin an inlawm tawh bawk a, sawi zui a hlawh hle.

Namaste Trump Event-ah hian prime minister Modi chuan thla nga kal ta khan US-ah 'Howdy Modi' hun hman a ni tawh tih sawiin, niminah erawh a ṭhian ropui tak Trump chuan Ahmedabad-ah a zinkawng 'Namaste Trump' chu a ṭan ve ta tih a sawi. Mipuite chu 'long live India-US friendship' tiin a aurual tir zui bawk.

"Hei hi Gujarat ni mah se ram pumin phur takin a lo lawm che a ni. POTUS, FLOTUS, Ivanka Trump leh Jared Kushner-te lo thleng hian Indo-US inzawmna chu a tinghet a ni. Khawvela democracy ram lian berah hian Motera kaltlangin president Trump hi ka lo lawm a ni," tiin lawmna thu a sawi.

US president Donald Trump chuan America chuan India chu a ngainain a zah bawk a, America chu India ṭhian rinawm a ni reng ang, a ti.

Thla nga kal taah khan US chuan Texas-a football stadium lian takah PM Modi hi a lo lawm tawh a, India chuan khawvela cricket stadium lian berah min lo lawm ve thung a ni, tia sawiin India mipuite chu an lo dawnsawn danah lawmthu a hrilh. 

"Prime minister Narendra Modi, thawhrimna hmangin engkim a tih theih tih i lantir a ni. India mite chuan an duh a nih phawt chuan engkim an tihlawhtling thei a ni."India ram hi Hindu, Muslim, Sikh, Jain leh Kristian maktaduai chuangte lungrual taka an awmna a ni. Ram pakhat chak leh ropui tak in ni reng ṭhin," a ti..

India leh US chuan defence lama an thawhdunna an tichak zel a, US chuan India chu ralthuam ṭha tak tak pek hlan a nghakhlel tawh a ni. Islam firfiakte dona kawngah pawh ram pahnih chu an thawkdun a, ISIS dona kawngah America chuan a theihna zawng zawng chhuahin, tunah chuan  Al Baghdadi pawh a thi tawh a ni, a ti.

"PM Modi hi 'chaiwala' tlawm taka bul ṭan a ni a, cafetaria-ahte thawk tawhin India mite chuan engkim an tihlawhtling thei a ni tih entirna a ni. Kum 10 lo awm leh tur chhung hian retheih lutukna umbo a ni ang," tiin Trump chuan a sawi.