ISL coach: Hmun danga hlawhtling zuite

Chutiang player leh coach langsar karah chuan European football leh level sang zawka tawnhriat lo nei nual tawh a, mahse hming langsar tak ni si lo Indian football rawn pan an awm nual bawk. 

ISL-a hun rawn hmang coach tam tak chu Indian football-ah an cham zui a, ṭhenkhat erawh hlawhtlinna ropui zawk chan beiseiin hmun dangah an kal nual. 

Coach ṭhenkhatin hlawhtlinna ropui tak an chhar zui a, Indian football an ngai tawh rih lo hle - chutianga hlawhtling zui coach chu eng zat chiah nge awm a, eng ang taka hlawhtlinna nge an chhar tih hi zawhna awm pakhat a ni. 

Kum 60 mi coach hian India lam hawia puanthuah tela Mumbai City a rawn enkawl hma khan an ram Costa Rica, Panama, UAE club ṭha Al-Wasl leh Chinese Super League club Tianjin Teda te enkawl mah se coach langsara chhiar a ni ngai lo. 

Kum 2016 khan Mumbai City enkawlin August 2018 thleng a cham a, June 2019 khan Colombian club ṭha America de Cali a zawm. America hi a season hmasa berah league nomawi a chawipui nghal a, fak a hlawh hle.

2017-18 season khan Joao de Deus hian NorthEast United a enkawl a, Highlanders a chhuahsan hnuah Saudi Arabia club ṭha Al Hilal-ah assistant coach hna a thawk zui. 

Al Hilal aṭang hian Brazil lamah Portuguese manager Jorge Jesus-a'n Flamengo zawmin a pu hi a zui zel a, an hlawhtling hle - Brazil Serie A leh South American Champions League nomawi an chawi a, Club World Cup final-ah Liverpool an ngam lo thung. 

NorthEast United fan-te chuan 2015-a an coach Farias hi an la theihnghilh lo ang - point hnih lekin semifinal an khel phak lo a nih kha!

Highlanders a chhuahsan hnuah Paraguay club Cerro Porteño leh Bolivian club The Strongest te a enkawl. 

The Strongest hi league nomawi a chawipui zui a, tunah chuan Bolivia national team enkawl hna a thawk mek - Under 23 team a enkawl tel bawk. 

Real Madrid technical director hlui hian 2017-18 season khan Delhi Dynamos a enkawl a, a hlawhchham. Spanish second division club Granada a enkawl zuai hnuah a lo kir leh a, Pune City a enkawl. 

Pune club hi match thum chiah a enkawl hman tihin ban a ni a,  December 2018 khan Bolivian club ṭha Jorge Wilstermann chu zawmin league nomawi a chawipui. January khan Bolivian club tho Royal Pari a pan a, champion beisei ngam zingah an tel mek. 

Spain international goalkeeper hlui hian kum 2016 khan ATK a enkawl a, a season khatnaah Kolkata club hi league nomawi a chawipui nghal. ATK-ah cham zui loin Mexico lam a hawi a, Liga MX club Atletico San Luis a enkawl zui. 

Mahse, Atletico Madrid goalkeeper hlui hi beisei anga a hlawhtlin loh hnuah ban a ni a, mahse a hnuah hna lian zawkin lo hmuakin Spanish Football Federation-ah Sporting Director hna a chelh a, Spanish legend Fernando Hierro a thlak. 

Sir Alex Ferguson-a hlawhtlinna thuruk an tih zinga mi Dutch coach hi Manchester United-ah assistant coach-in a awm reng ṭhin a, a tawnhriat a ropui tham hle. 

Kum 2017 khan beiseina sang tak nen Kerala Blasters a pan a, mahse Fulham boss hlui hi season zawh hmaa ban a ni. Australia national team-ah assistant coach-in a thawk zui a, Graham Arnold nena thawkdunin Australia chu World Cup 2022 hruai thleng thei dinhmunah an ding mek.