Thawhlehna tiamtu Wilder

Tyson Fury hneh loa tlawm hlim Deontay Wilder chuan a thawh leh ngei tur thu a sawi a, "Ka tlukna aṭangin ka tho leh ang," a ti - Wilder hian WBC heavyweight title a kawl chu Fury lakah a chan a ni. 

Wilder hian social media lamah video pholangin a lo kir leh ngei tur thu a sawi a, "In Lal chu heta hi ka awm e, indona a inṭan chauh avangin khawiah mah ka kal lo ang. "Min ṭantute ka hmangaih em em che u a, thla rei loteah kan inhmu leh thuai ang," a ti - Wilder hi MGM Grand Arena-a Fury nen an intawn khan vawi hnih a tlu a, round sarihnaah a team-ten inhrukpuan var theh lutin an tlawm tih an lantir.

 

Wilder hian US media hmaah Fury a hmachhawn nawn leh tur thu a lo sawi tawh a, US bika Fury-a promoter Bob Arum hnenah Fury hmachhawn nawn a duh thu hi a hriattir tawh. Arum chuan, "Olympic hma (July 24)-in inhnek tir kan tum ang," tiin a sawi a, Fury leh Anthony Joshua inhnek lai hmuh châk ten an la nghah leh hret a ngai dawn.

Fury-a'n a vawi thum nana Wilder a hmachhawn dawn takah chuan Joshua pawh hian IBF dana a hmachhawn hmasak tura tih Kubrat Pulev chu a inhnekpui leh phawt a ngai dawn tihna a ni. Arum chuan, "Fury-a'n Wilder a knockout angin Joshua hian Pulev a knockout ang a, kum tawpah fight ropui kan hmu ang," tiin Joshua leh Fury inhnek tir ngei a tum thu a sawi.