Lyon keeper-in Ronaldo a huphurh

Zanin dar 1:30 hian Lyon chuan Champions League last 16 khel turin Juventus an mikhual dawn. Ligue 1 club keeper Anthony Lopes chuan Cristiano Ronaldo chu player ṭha chungchuang a nih thu leh hmachhawn a hautak tur thu a sawi.

Lyon hi Ligue 1 lama beisei phak lo an ni, an ram league-ah pasarihna dinhmun luah lai ni mah se 11-na Nantes nen an point hmuh a inzat reng - hmahruaitu Paris Saint-Germain an phak lohna chu point 17 zet a ni hial.

Juventus erawh Lazio leh Inter Milan ten an nek buai chungin Serie A hmahruaitu an la ni reng, player ṭha bik Ronaldo awmna an nih avangin zaninah pawh chak tura rinkai zawk an ni ang.

Kum 35 tling tawh mah se Ronaldo ṭhatna a la nep chuang lo, season kal laia goal 25 khung tawhtu hi Lyon tan chuan ven bik ngai a ni dawn chiang; Real Madrid forward hlui hian Portugal tana a khelhpui Anthony Lopes goal venah chhuih luh a tum dawn.

Lyon keeper Lopes chuan, "Ronaldo nen hian Euro leh World Cup kan khel dun tawh, inkhel boruak sangah a ṭhatna a zual ṭhin. Champions League lama a sulhnu chu inhrilh nawn a ngai lo, uluk leh zuala kan ven a ngai dawn.

"Barcelona emaw Juventus emaw kan hmachhawn a nih chuan hlauhawm hi hmun hrang hrang aṭangin a rawn thleng thut thei reng tih kan hria. Ronaldo ṭhatzia kan sawi rual hian player dang pawh an hlauhawm vek," a ti.

Juventus hian tun hnai season riat chhung chu Serie A nomawi an chawi tawh, season kal laiah pawh rinkai ber an ni. Mahse, Turin club hian European football lamah beisei an phak lo - beiseina sang tak nen Ronaldo an lalut.

Season hmasa khan Ronaldo hoin UCL khel mah se quarterfinal-ah rin loh takin Ajax an ngam lo. Kuminah beiseina sang zawk nen an inlan leh a, league leh Coppa Italia nomawi chauh chuan manager Maurizio Sarri pawh a dinhmun a him lo thei, a awmzia chu UCL nomawi an duh takzet.

Italian club lian hian 1996 khan Champions League nomawi an chawi, a hnu lamah final vawi nga ngawt lut leh tawh mah se a chak lo zawkah an ṭang zel. Player ṭha tam takin an tih theih lo ti thei ṭhintu Ronaldo tan pawh Juve tana UCL champion nih tum hi chona a ni.

France ram khawpui zingah Lyon hi mihring cheng tam lamah pathumna a ni - Paris leh Marseille te chiah a tluk lo. Khawpui mawi leh khualzin miten an tlawh nasat a ni a, kum 2014 leh 2016 pawh khan Juve hi an lo lenglut tawh; a vawi thum nan an tlawh leh dawn.

An khelmual Groupama Stadium hi kum 2006-a an hawn kha niin mipui 59 286 an leng, season hmasa khan Barcelona an mikhual ṭumin goal lut loin an lo inhnehtawkpui tawh - Old Lady pawh dan leh an tum ang.

Lyon coach Rudi Garcia chuan, "League-ah kan dinhmun a ṭha lo, Champions League khel phak china awm kan phak lohna chu point sarih lai a ni. Ligue 1-ah harh chhuah kan ngai a, chumi hma chuan UCL-ah hian fiahna hautak tak mai chu kan hmachhawn hmasak a ngai," a ti.