Mau hmangin Mizoram economy thlâk danglam theih a nih ka ring - Chief Minister

Sustainable Development Goals (SDG) Conclave 2020: Partnerships, Cooperation and Development of North Eastern States chu February 24, Thawhṭanni khan Guwahati-ah ṭan a ni a, vawiinah zawh a ni ang. A hawnna inkhawmah chief minister Zoramthanga chuan, mau hmangin Mizoram economy thlak danglam theih a nih a rin thu a sawi.

DoNER minister Dr Jitendra Singh hoa meeting-ah hian CM Zoramthanga chuan, hmasawnna tluantling leh rintlak (sustainable development goals) neih hun rei tak a lo ngaihtuah tawh thu a sawi a, "Tunah chuan a takin a buaipui ṭan theih ta. State dang tan pawh hman theih a ni mai thei a, mahse, state dang chu an Chief Minister-te'n an hre chiang ber a, Mizoramah chiah ka insáwrbing dawn," a ti.

Zoramthanga chuan, intodelh turin Mizoramin ram ṭha tak leh boruak ṭha tak a neih thu sawiin, "Ram rálmuang ber leh literacy sang berte zinga mi kan ni. Kan mamawh chu chawah intodelh a ni a, chu chuan thlai leh sate pawh a huam. Central sorkar puihnain chu chu kan thei ang," a ti a; chaw bakah, econmoy lama intodelh a ṭul thu a sawi.

Economy lamah chuan, tlang ram loneih hun rei tak kalpui a ni tawh a, a hlâwk loh thu sawiin CM Zorama chuan, "Kan thlak danglam a ngai.  Tlang ram loneihah chuan kum tin thlai chîn thar a ngai ṭhin. Eng nge sustainable development atana ṭha kan ngaihtuah a ngai. Ram kan nei a, chutah chuan a thar chhuah, a phurhna, a sawngbawlna leh a hralhna ngaihtuah chunga rintlak leh tlo tur thlai kan chîng dawn a ni," a ti.

Zoramthanga chuan, sus­tainable economy atan ṭhelrêt leh kuhvate pawh a ṭhat thu sawiin, "Hengte hi chu hmun hniama tih chi a ni. Tuna kan kalpui tur chu mau a ni," a ti a, mau hmanga Mizoram economy an thlak danglam theih a rin thu a sawi.

Chief Minister chuan, kum 15 vel kal taah World Bamboo Congress-a thu a sawinaah, mau lam buaipuitu khawvel hmun hrang hranga kal khawmte hnenah mau ṭha chi tissue culture hmanga siam thei an awm leh awm loh a zawh thu a sawi a, "Siam thei an awm lo. Kum sarih/riat hnu velah India scientist-in a ti thei a, chumi hmang chuan hma kan la a ni," a ti.

Mau/rua chìn chu India hmar­chhak state-te tan a ṭhat thu sawiin Zoramthanga chuan, "Vawi khat chìn tawh chuan kum 40/50 a daih a, kum tin phun a ngai lo. Thla ruk chhungin a lian thei a, chutiang chu thil dangah a awm lo. Ram hectare hnihah chuan loneitute'n cheng nuai 10 an lak luh theih ka ring. Mahse, central puihna a ngai a, sumah min puih a ngai," a ti.

Meeting-ah hian CM Zo­ramthanga hian hmarchhak state chief minister zawng zawng­­te'n a huhoa prime minis­ter Narendra Modi hnena me­morandum thehuh a rawt a ni.

Ø    Hmarchhak state tana budgetary gross support 10%-a dah a nihna tur ang taka hman. NEC meeting hnuhnung berah NLCPR sum hman loh cheng vbc. 6,000 chuang a awm thu sawi lan a nih laiin, NEC-a sum dah chu cheng vbc. 308 chauh a ni. NEC-a sum dah hi hmarchhak state pariatte'n cheng vbc. 40 velin an insem thei a, meeting a hautak ṭhin a, cheng 10 nei tura cheng 100 sèn ang vel a ni. Budgetary gross support 10% hi a nihna tur anga hman a nih chuan hmarchhakin nasa takin hma a sawn ang.

Ø    External aided project-a hmarchhak state-te'n an tum ve ṭhin 10% ni ṭhin, 28%-a kai chho ta tihniam leh a, 10%-a dah lêt.