KHAWTHLIR
THISEN PE
MTP, Siaha College Vaih Branch chuan nimin khan Saiha District Hospital tan thisen unit 18 an pe a, petute mipa 12 leh hmeichhia pathum an ni. Hrangbana College NSS chuan nimin khan Aizawl Civil Hospital-ah thisen unit sarih an pe a, Chanmari Branch YMA-in unit sarih an pe bawk.
KHAWL ENPUI
Covid-19 Medical Operational Team chuan an chairman Dr ZR Thiamsanga hoin Thawhlehni khan Zoram Medical College-a dialysis khawl bun mek an enpui. ZMCa dialysis khawl palite chu hman theih nghal tura ruahman mek a ni.
MULCO
MULCO hnuaia Aizawl veng hrang hranga bawnghnute hralhtu, MULCO-in ID card an pekte chu bawnghnute an buaipui theih hun chhung atan zing dar 6-8 ruat a ni a, chumi chhhung chuan an chhuah phalsak an ni. Veng tina task force-te chu a ṭul anga lo enpui tura ngen an ni.
FEH THEI CHIN
Aizawl District Magistrate chuan nimin khan Aizawl district-a ram lama hna thawka feh tura phalna pekte chu eizawn nana hmanga ni tin feh ṭhinte chauh an nih thu a puang. A huhoa kal emaw, hlawhfa ruaia a ruala feh te, awm khawm te chu tih loh tur a nih thu a puang bawk.
MIPUI NGEN
MNF ṭhalaite chuan thuchhuah siamin, coronavirus (Covid-19) laka invenna leh dona atan sorkar hmalaknain ni eng emaw zat inkharkhip a nih tawh avangin mipui vantlang nunphung a buai mek zel tih an tarlang a; chuti chung chuan, sorkar hmalakna chu Mizorama cheng zawng zawng tana ṭha zawk tur a nih avangin dawh hram hram turin mipui an ngen.
DC LEHKHA NGAI
FCSCA department aṭanga buhfai dil tur chuan an dilna hmuna DC kaltlangin dil tur a ni a, DC lehkha tel loa dilna lut chu ngaihtuah a nih dawn loh thu sorkar thuchhuahin a tarlang.
INKALPAWH LOH TUR
Serchhip DC H Dolianbuaia chuan, ramriah Myanmar nen inkalpawh a rem rih loh avangin Mizo hnahthlak leh Mizoram khua leh tui Myanmar-a chambangte chu inkharkhipna hlih a nih hma chuan Mizorama luh tum lo turin a hriattir. Serchhip SP R Sathiyasundaram chuan, Sailulak leh Lungkawlh V/C president leh village task force-te chu sorkar thuchhuak hi Myanmar-a Zo hnahthlak khua awmte hnenah phone hmangin emaw hrilh chhawng turin a ngen a ni.