Nizzamudin-a inkhawmpuiah Mizo tel lo

Hazrat Nizzamudin, Delhi-a Mosolman ho Tablighi Jamat inkhawmpuinaah Mizo emaw, Mizoram mi emaw, hnam dang Mizorama hna thawk emaw tel an awm lo.

He inkhawmpuia telte zingah Covid-19 kai phah mi eng emaw zat an awm tih fi nfi ah a ni tawh. Sorkar laipuia intelligence-te chuan Mosolman inkhawmpui avanga Covid-19 kai palh thei list an tichhuak a, chutah chuan Mizo hming 30 vel leh Mizorama hna thawk hnam dang hming a lang. List-a hming langte chu Mosolman khawmpuinaa tel chauh ni loin, Nizzamudin bul hnaia mobile tower kaltlanga mobile phone hmangte an ni. Mizoram police-te chuan an chhui zui nghal a, Mosolman inkhawmpui avanga Mizo emaw, Mizorama hnathawkte tan Covid-19 kaina chance a awm loh thu leh hlauhthawn tur a awm loh thu Vanglaini palai an hrilh.

Police aṭanga thu dawn danin, Tablighi Jamat vanga Covid-19 kai palh thei list tihchhuahah hian Mizo leh Mizorama hnathawk mi 32 an tel a ni. Chu'ng mite chu inkhawmpuiah hian an tel lo a, a bul hnai takah pawh an kal lo a; Nizzamudin bula mobile phone tower-in a man phak chin aṭanga mobile phone an hman avanga list-a lang ve an ni.

Thu dawn danin, Mosolman inkhawmpuina hmun Hazrat Nizamuddin aṭanga km. 1.50 velah Delhi Mizo Presbyterian Church inkhawmna hmun a awm a. Mosolman ho inkhawmpui lai, March 15-ah pawh Mizote hi an la inkhawm  a ni. He mi chungchangah hian Union Cabinet secretary Rajiv Gauba chuan nimin khan state tina Chief Secretary leh DGP-te chu video conferencing kaltlangin meeting a neihpui a;   uluk taka chhui chhuak vek turin a hriattir.