CM Relief Fund-ah luh belh zel

.Covid-19 do nan Chief Minister, Deputy Chief Minister, Speaker, minister te, Deputy Speaker, Deputy Govt. Chief Whip leh Lunglei HPC Chairman ten an thla chanve hlawh ṭheuh leh MLA dang zawngin an kar khat hlawh ṭheuh Chief Minister's Relief Fundah an thawh a; a vaiin Rs. 21,26,000 a ni. Sum (cheque) hi nimin khan Assembly speaker Lalrinliana Sailo-in CM Zoramthanga hnenah a hlan.

Mizoram UPC chuan CM Relief Fund-ah hian nimin khan Rs. 2,00,000 an thawh a, executive chair man Upa Andrew Lal dingliana leh general superintendent Rev. C Lalremsangate'n an hlan. Mizoram Engineering Service Association member-te'n an ni khat hlawh an pek khawm cheng nuai 10 chu nimin khan CM Relief Fund-ah an thawh.

MNYF headquarters pawhin nimin khan CM's Relief Fund-ah Rs. 50,000 an chhūng bawk. Coronavirus donaa hmalakna atana CM Relief Fund-a sum chhūn luhte hman dan ngaihtuahtu tur Committee on Utilization of Chief Minister's Relief Fund for Covid-19 nimin khan din a ni a, chief secretary Lalnunmawia Chuaungo chu chairman niin, member-ah sorkar official bakah NGO Coordination Committee Chairman leh Mizoram Kohhran Hruaitute Committee aiawh an tel.