CAA ah dinna nghet neih a ṭha

Tun hnaia Vang­laini chhuak hi han chhiar han chhiar la, Citizenship Ammen­dment Act (CAA) duhlohna lam thu ziak kan hmu hnem hle a, chutian gbawkin BJP lam Amit Shah leh mi dang dangin Pro-CAA rally an buatsaih kan hmu bawk a, CAA hi Mizoram tana a pawi loh thu thu ziak te pawh kan hmu tel a, ziaktu pakhat phei chuan CAA chungchang Mizoram tana a hlauhawmna thu ziakte chu inti hre ril leh in ti changkang angin a chhuah hial tihte kan lo chhiar chho ve zel a ni. 

December-ah khan United Nations High Commissioner for Human Rights-a an spokesperson Mi­chele Bachelet chuan, “We are con­cerned that India’s new Citizenship (Amendment) Act 2019 is fundamentally discriminatory in nature” tih kha a lo sawi tawh. A sawi dan hi ka thiam danin han letling chhin dawn ta ila, "CAA 2019 hian thleibik a nei a, hei hi kan ngaimawh hle a ni," tihte pawhin a lehlin theih ang chu. Hei hian CAA hi a rawn vei hla khawp mai a, CAA-in a huam loh china veitu hi inlak changkan vang a ni lo ang chu maw? 

Pakhat leh chu European Parlia­ment lamin CAA chung­chang an ngaihven thute kha a ni leh a, European Parliament hi European Union-a dan siamtu an ti leh zel bawk si a, kan CAA hi a huam chin tur pawn lam pawhin a ṭha lo tiin an vei hle tih chu a lang reng mai. 

Engpawh chu lo ni ta reng reng se, CAA (or CAB) hi a tirah khan khati khan kan duh lo let tawp emaw kan lo ti a, kan duh loh dan leh tuna kan vote (support) leh si dan en hian a hming maia zu duh lo kan angin ka hria a, Mizorama zu duh lo in ti ve em em si Vairama zina zu in leh duk duk, "Vairamah chuan zu an zuar a, a pawi hleinem" tihte pawh a ang a, CAA chu min huam dawn chuan thil ṭha lo, min huam loh chiaha ṭhenawmte a huam chuan support leh si te hi a awm theih dawn a lo nih hi politics che vel tak hi chu aw. 

CAA hi a duh lotu lam chuan an thihchilh tawhin an la do zui zel a, Mizoramah pawh CAA duhlohna hi an la ziak zel ngei ngeiin a rinawm. CAA chungchanga midangte lo khak mai lo hian, a dotute do chhan lo sawi nep sak bik tum lo hian, CAA hi kan thlawp a nih chuan, "Kan thlawp a ni," ti mai ila. 

CAA duh lotute lo dem leh lo sawisel hi chu politics avanga mitvai kan sawi ṭhin ang kha a ni ta a, poli­tics rui tawh chuan zu an duh loh pawh an party support naa an zawrh chuan an fak leh mai a, CAA pawh an party (BJP hlauh tlawn vang?) lamin an thlawp chuan an fak leh mai a, dinna mumal tak neih ve a ngai. Mizo Kristian hian CAA hi ṭha kan ti thar leh dawn nge ni anga kan la do zel dawn tih te pawh hi hriat a harsa ve ṭan a ni.