Ruihhloa fihlim police

Police headquarters-a building thar hawnaa thusawitu chief minister chuan, "Ruihhlo leh zu-ah buai tâwk kan tam a, hemi hi kan tan chonaah lain, fihlim tura hma kan lak a pawimawh," tiin ruihhlo laka fihlim turin Mizoram police-te chu theihtawp chhuah zel turin a fuih. 

Mizoramin harsat­na a tawh lian tak pakhat chu kan ṭhalai, hnathawk thei rual, tha za rual leh ngal chak ber tura ngaihte zu leh ruihhloa an buai a, an zawi nguai hlawm mai hi a ni. Chutiang mite venghima enkawl a, a tichhetu zu leh ruihhlo laka veng thei tura beisei kan police-te zingah ngei pawh zu leh ruihhloa fihlim lo an awm nual mai hi a pawi hle. 

Zep thu a cheng lo, thawh khatlaia a hlawma police a nih vak ṭum khan a latu lam an hmanhmawh deuh nge ni, police atana ṭang tlak lo tur khawpa ruihhlo leh zua buai sate lak an ni nawk a, pianphungah pawh min venghim tura kan iai deuh turte thlenga lak an awm niin an sawi ṭhin. Police ṭan tawh hnua mahni inveng zo loa zu leh ruihhloa tlulut chu a awm theih ngai a; nimahsela zu leh ruihhlo lama uai sa police-a kan la mauh mai kha a pawi ngawt mai. 

Mizo ṭhalai rual zu leh ruihhloa an buai pawh a pawi tawh tehlul nen, a chhanchhuak tura beisei police zingah ngei pawh he thila buai ve tho mi tam tak an la awm hi a pawi lehzual a. Zu avanga nunna chân hial te, zu avanga la buai zuite leh ruihhlo avanga hnathawka chhawr tlak mang lote an awm ta. Tunah chuan kan nih nih kan ni tawh a, a chhanchhuah hna thawh zel hi a pawimawh takzet a ni. 

Police department lam pawhin mahni unit ṭheuha harsatna tawkte zawn chhuah a, siam ṭhat tuma hmalak a ngai a, kan mualpho deuh a nih pawhin nakin zela kan police-te leh kan ram ṭhat tlanna tur a nih chuan mualpho huama ke pen a ngai ta. Zu vanga police thih thu sawi a awm fo a, tunah chief minister ngei pawhin zu leh ruihhloa buai an la tam thu a zêp lo a, siam ṭhatna turin khua a la tlai lo a, kan police-te nungchang leh inthununna (discipline) lam hi uluk zawka vil zui a pawimawh khawp ang.