China: Interpol president hlui Kum 13 chuang tang dawn

Chinese court chuan Thawh­lehni khan International Cri­minal Police Organization (Interpol) president hlui, Meng Hong-wei chu US dollar maktaduai 2 chuang thamna laa puhnaah thiam loh a chan tir hnuah, kum 13 leh a chanve lungin tang turin thutlukna a siam. 

Chinese official zinga Interpol president hmasa ber Meng hi a mimal hlawkna turin a thuneihna a hmang nia puh a ni a, an chhungkua hlawk nan state fund a hmang nia phuh a ni bawk tih Party disciplinary watchdog, Central Commission for Discipline Inspection (CCDI) chuan a tarlang. 

China president Xi Jinping kaihhruaina hnuaia kum 2012-a neih ṭan Anti-corruption campaign hnuai­ah heng an puhnate hi Chi­nese anti-corruption agency, National Supervisory Commi­ssion chuan kum 2018 khan a chhui hna an thawk ṭan a ni. 

Meng hi Interpol president a nih laiin France aṭangin China panin kum 2018 September 20 khan a zin a, September 25-a China a thlen hnuah discipline authority-te hian thu zawhfiah an duh vangin an hreng zui a ni.

A nupui chuan kum 2018 October 4 khan a pasal Meng chu China-a a bo thu French police hnenah a tlen a, a nupui hi venhimna pek nghal a ni bawk. Political asylum-in tunah hian French-ah a khawsa mek.

Chinese top political advi­sor, Chinese People's Poli­tical Consultative Confe­rence aṭang­in kum 2018 October 26 khan Meng hi an ban a, Commu­nist Party aṭangin nikum March 27 khan ban a ni a, CCDI chuan sorkar hna aṭangin ban a ni bawk tih a tarlang. 

Meng Hongwei hian kum 2016 November 10 aṭanga October 7, 2018 thleng khan Interpol-ah president hna a chelh a ni.