Inter tan Eriksen-a'n goal a khung

Christian Eriksen chuan Inter Milan tana a goal hmasa ber khungin a club hi Europa League last 32-ah hnehna a chanpui, Italian club hian an mikhualna ramah Ludogorets Razgrad chu 2-0 in an luhchhuah.

Ningani zan inkhelah Inter tan hian midfielder Eriksen-a'n minute 71-naah goal hmahruai a khung bakah, bench aṭanga rawn lut striker Romelu Lukaku chuan hun tawp hma chiahin an goal hnihna penalty aṭangin a khung bawk.

February 27, Ningani zan hian San Siro-ah second leg khelh a ni leh dawn, coach Antonio Conte naute hi last 16 lut turin an dinhmun a ṭha  - tlang tur chuan goal an khung lo a nih pawhin goal venhim a tawk.

Inter manager Conte-a'n Serie A lampang a ngai pawimawh a, Europa League-ah a player neih ṭhat tam zawk chu bench lamah a dah. Alexis Sanchez, Victor Moses leh Ashley Young te pawh bench aṭanga luhtir an ni.

Conte naute hian Pathianni zan dar 1:15 hian league lamah Sampdoria an mikhual zui leh dawn, table-ah pathumna ni mah se match khat result avang lekin hmahruaitu pawh an la ni daih thei - an tan chetsual loh a pawimawh.

Italian manager Conte chuan, "Match kan ngah avangin a chang chuan player siksawi a ngai, tun ṭumah pawh hmun chang tam tawk loten ṭha taka an khelh theih tho avangin a lawmawm hle.

"Eriksen khelh dan khan min ti lawm, player tam tak chu an awm hmun an sawnin an buai deuh ṭhin. Tunah chuan ani pawh a insiamrem chho mek, tun aia ṭha khan a la khel thei tih pawh ka hria," tiin Denmark international chungchang a sawi.