Milarte Chîn dan mak leh danglam

Mitin hian thil chîn ṭhan bik, mak leh danglam ang reng kan nei fo. Hlauh zawngte pawh a inang lo hle a, hlauh loh tur nia kan ngaih, hlauhawmna nei reng reng lo hlau em em a awm theih. Khawvela mi lar ber berte hian chîn ṭhin danglam tak tak an nei hlawm; a ngaihnawm duh phian, 'tiang hi.

Apple Inc. khaipa ber ṭhin, famta Steve Jobs khan chawhmeh ngai hi kar khat tal a ei ṭhin. Carrot a ei lak lawh chuan kar khat tal carrot a ei chhunzawm a, apple a ei a nih chuan kar khat tal a ei thei dang ei lovin apple a ei zui ṭhin. Hetianga a tih hian a taksa a rimchhe duh lo va, kar khatah vawi khat bak inbual a ngaih loh phah a ti; a inbual peih loh chhuan lam pawh a ni mai thei.

Facebook hmuchhuaktu Mike Zuckerberg hian ama talh leh thah kher loh chu eng sa mah a ei duh ṭhak lo! Kum 2011 aṭang khan sa ei lovin thlai leh theirah chauh a ei ta law law a ni. A hma chuan sa ei ṭhin tho a, mahse a sa ei tur reng reng chu ama'n a talh a nih kher a ngai a, midangin an talh chu a ei ngai lo.

Motor siamchhuaktu, Ford dintu Henry Ford khan weed (marijuana) a ei ziah ṭhin a. A ngaihdan chu mihring taksa pawh hi motor khawl ang deuh a ni a, fuel a mamawh ve a ni, a ti a. A taksa fuel chu weed a ni a, a in bulah a chîng a, a ei mai ṭhin.

Evolution theory te, natural selection te kan sawi apianga hming lo lang chu Charles Darwin hi a ni. He pa hian a ei hrawmhraw ve hle a, ramsa a hmuhchhuah thar apiang chu a ei zel. Chung zingah chuan ei ena an en lem loh armadillos te, iguanas te, chhimbuk te pawh a ei zel a ni âwm e. Gourmet Club-ah a tel ṭhin a. He club thil tum ber chu ramsa leh nungcha, hmuh zen zen tur awm lote sa a tam thei ang ber ei a ni tawp mai!

Tennis star Novak Djokovic thil chîn ṭhin mak tak chu a chak apiangin hnim a ei ṭhin! Kum 2011-a Nadal a hneh hnu khan Center Court-ah a ṭhingṭhi a, hnim a pet a nih kha.

Katy Perry ha hi a var ṭha ṭhêt ṭhâwt hle a, ani pawh hian a chhuang a niang, a nui var ṭha reng a nih hi. Hetianga ha var nei reng tur hian a bei nasa hle a, nitin ha vawi ruk a nawt ngei ngei a, a kalna apiangah ha-nawhna ṭhahnem tak a keng ngei ngei bawk.


Share this Post

Login to comment
No Comments