'Kei leh MLTP Act' album a tlangzarh dawn Vincy - Zu ka fak lo, kan khap dan hi kan zo lo
Mizo rapper thiam leh hlawhtling, Vincy Chhangte chu tun Inrinni zan hian Vanapa Hall-ah a album 'Kei leh MLTP Act' chu a tlangzarh dawn ta. Album tlangzarh inkhawm hi dar 7-ah ṭan a ni ang a, release function tawi tê a awm ang a, concert-in a zui ang. 'Harh fimin DJ nen rap concert' Vanapa Hall-ah hian a awm dawn a. Entry Rs. 50 chauh a ni ang.

November 30 zana hla 30 awmna album 'Kei leh MLTP Act' tlangzarh turah hian Guest artist an awm dawn a. Mizo Idol-a mi Biakmuana, Donny Chhangte leh Lil Wiz te an zai dawn bawk a. Donny Chhangte leh Donny Chhangte hian a album-ah hian an pui nasa hle a. Donny Chhangte nen hian Zofate tan leh Kei leh MLTP Act an sa dun a, Biakmuana nen hian Tunlai Khawvel hla an sa dun bawk. Fate da Curr-in an pui bawk a, 'Ka beidawng ve ngai em' tih Vincy nen an sa a. PC Puia nen Mi 2 Khat Tal Tan tih hla an sa dun. Album hi Pu Remmuana, Addl SP (Rtd) chuan a tlangzarh ang.

'Kei leh MLTP Act' album hi zaithiam famta Gnat Lalrinchhana hriatreng nana a hlan a ni a, Gnat-a pual hian hla pakhat a dah bawk. He album hi CD-a hralh a ni dawn lo va. Release zan hian a download theihna tur link leh password a pe ang a, chuta ṭanga download tur chu a ni. A hnuah downloading password hi thlak lehnghal a ni ang.

Music leh hlate hi Vincy siam vek niin, ama'n a record vek bawk a. A album aṭang hian Biakmuana nena an sak 'Tunlai Khawvel' chu single-a, music video-a tihchhuah a tum a. Album release hnu hian music video hi buaipui nghal char char a ni ang.

Vincy hian October thla aṭang tawh khan MLTP Act tour a lo nei tawh a, album tlangzarh hnu hian a tour hi a chhunzawm ang. MLTP Act tour-ah hian khaw ṭhenkhatah a concert an phal lo ṭhin. Zu sawi mawi leh fakah an ngai ṭhin. Hemi chungchangah hian Vincy chuan, 'Zu hi ka fak lo va, zu in turin tumah ka tur hek lo. Mahse kan khap dan hi kan zo lo a ni,' tiin zu khapna dan siamṭhat ngaia a hriat thu a sawi a.

Facebook-a Vincy-a fans te tan Vincy hian party a buatsaih dawn bawk a. Vincy chuan, "Kawng engkimah min thlawp ṭha em em a, an chungah ka lawm tak zet a, kan lawmzia lantir nan hian thil eng emaw tal tihsak ka duh a ni," a ti. Sibby Farm-ah Vincy hian party hi a buatsaihsak ang.


Share this Post

Login to comment
No Comments