Report pe dawn
Mizoram sorkar bultuma tun hnaia press tour-a Nagaland, Kolkata, Sikkim leh Meghalaya tlawha zin MJA member-te chuan vawiin chhun dar 12:30 hian Aizawl Press Club-ah zin report an pe dawn a, IPR minister Lalruatkima'n a hmanpui ang.
Tla hlum
Power & Electricity engineer-in-chief hlui Liannghinglova Pachuau @ L Pachuau (64) chu nimin chhun dar 1 vel khan an in chung aṭangin a tla a, Aizawl Civil Hospital ICU-ah enkawl nghal ni mah se, a hliam tuar loin nimin tlai dar 4 vel khan a thi.
Thisen pe
Mission Vengthlang Branch KṬP chuan February 9, Inrinni khan an kohhran hall-ah blood donation camp an huaihawt a, mipa 38 leh hmeichhia pariatte'n Synod Hospital tan thisen unit 46 an pe.
In kâng
February 8, 2019 zan 8:30 vel khan Venghnuaia Man Maya-te in chu bungraw chuh hman loin a kâng ral. Inrinni khan Venghnuai khawtlangin in an sak ṭhatsak. Man Maya-te hi bawng vulh an ni a, an bawng vulhna bulah awmin, kângmei chhuak vang hian bawng pathum an hliam a ni.
Lok Adalat
Koalsib District Lok Adalat chu Inrinni khan Kolasib District Court-ah an ṭhu a, chief judicial magistrate Sylvie Z Ralte-in a kaihruai. Lok Adalat-ah hian thubuai 45 ngaihtuah an ngaihtuah a, thubuai panga an ching)fel. Leiba inṭhìnna aṭangin Rs. 21,200 hmuh a ni.
Ruihhlo man
Central YMA hnuaia ruihhlo do pawl SRS leh 23 Sector Assam Rifles chuan February 8, 2019 zan khan Lailapur, Assam aṭanga Mizorama heroin lak luh, Bagha cap 296 leh Alprozelam mûm 56 an man a, a kaihhnawihah mi 16 man tel. Heroin man hi Rs. 1,48,560 hû a ni.
MNF-in Nomination Committee an din
MNF party chuan tun hnai khan Lok Sabha inthlanpui, MLA bye-election, Aizawl Municipal Corporation bye-election leh district council bye-election awm tur atan Nomination Committee an din a, chairman chu an president Zoramthanga niin, secretary chu party general secretary C Lalrammawia te an ni. Member dangte chu - elected office bearer zawng bakah, Lalchamliana (minister), Lalruatkima (minister), H Rammawi, D Thangliana, Lalthlengliana leh Liansuama te an ni.
