J&K-ah IAF-ten mi 538 thiar chhuak

Vur sur nasa vangin Jammu and Kashmir-ah ni nga chhung kawngpui khar a ni tawh a, hei vang hian Indian Air Force (IAF)-te chuan Jammu leh Srinagar-a tangkhang mi 538-te chu thlawhtheihna hmangin a thiar chhuak. 

IAF-in thlawhtheihna hmanga a thiarchhuah zingah hian zirlai 319, Graduate Aptitude Test in Engineering (GATE) nei turte an tel. Heng zirlai zinga 179 chu Zirtawpni khan Srinagar aṭangin Jammu-ah hruai an ni a, civil mi 180 pawh Jammu aṭangin Srinagar-ah hruai a ni. Inrinni khan zirlai 140 leh khualzin 39-te chu Srinagar aṭangin Jammu-ah hruai an ni leh bawk. 

Vur tawlh leh leiminin J&K-a kawngpuite a hnawhping a, kawng lakah bungraw phur motor tam tham tak an tangkhang mek bawk. Ni nga chhung kawngpui  khar a nih tawh avangin state chhunga tuialhthei stock pawh a tlem tawh a, thuneitute chuan pump hrang hrangte hnenah ni khatah mi pakhat hnenah petrol litre 3 leh diesel litre 10 aia tam hralh lo turin a hriattir. Vur sur nasa avangin Srinagar Airport pawhin flight eng emaw zat a cancel tawh bawk a ni. 



Share this Post

Login to comment
No Comments