Priyanka-in UP a tlawh dawn

Congress general secretary atana ruat thar, Priyanka Gandhi Vadra chuan vawiin hian ni li cham turin  Uttar Pradesh a tlawh dawn. Hei hi party hruaitu atana ruat a nih hnua UP a tlawhna hmasa ber tur a ni. 

Eastern UP-a general secretary charge la tu, Priyanka hi a nuṭa, Congress president Rahul Gandhi bakah Western UP charge la tu, Jyotiraditya Scindia ten an ṭawiawm dawn. 

State Congress chuan Congress hruaitu pathumte hi ropui taka lo hmuah an tum a, km 12-a thuiah roadshow neihpui an tum niin senior Congress leader KC Venugopal chuan a sawi. Rahul Gandhi, Priyanka Gandhi Vadra leh Scindia-te hian kawng laka an party office-ah chawlin, Mahatma Gandhi leh Rajiv Gandhi-te zahna an hlan dawn a ni. 

Rahul Gandhi hi vawiin vek hian Delhi-ah a kir leh nghal ang a, Priyanka leh Scindia-te chuan Lucknow-a state Congress office-ah February 12, 13 leh 14 hian party worker-te an kawm zui dawn a ni. 

Lok Sabha-ah Uttar Pradesh hi seat ngah ber niin seat 80 an nei a, hei vang hian party hrang hrangte chuan Lok Sabha inthlanpui lo awm turah UP-ah chet ṭhat tumin an bei ngawrh tawh hle. Kum 2014 inthlanpuiah khan Congress hi a che chhe hle a, seat hnihah chiah hnehna changin BJP chuan seat 71 a la thung a, Apna Dal in seat 2 leh SP in seat 5 an la bawk. Hei vang hian kumin inthlanpui lo awm atan Congress party chuan ṭan a la nasa hle a, Priyanka-i bial, Eastern UP-ah hian Lok Sabha bial 42 awmin heng zingah hian Prime Minister Narenda Modi-a bial, Varanasi leh state chief minister chakna, Gorakphur bialte pawh a awm tel a ni. 



Share this Post

Login to comment
No Comments