SBSP-in BJP nena thawhdunna tihtawpah vau

Uttar Pradesh-a BJP thawhpui, Suheldev Bharatiya Samaj Party (SBSP) chuan BJP kaihhruai sorkarin February 24-a Social Justice Committee rawtna siam chu a taka a kalpui lo a nih chuan BJP chhuahsanah a vau. 

Kum 2017 state assembly inthlanah khan BJP hian seat 403 awmah seat 312 a la a, SBSP hian seat 4 a la a ni. 

SBSP general secretary Arun Rajbhar chuan, "BJP hian kan thil phut hi a tihlawhtlin loh chuan kan thawhpui thei tawh lo ang. February 24 thleng hun kan pe a, hemi chhunga kan ngenna a tihhlawhtlin loh chuan kan thawhdunna titawpin, Lok Sabha inthlanpui lo awm turah pawh kan party hmingin seat awm zawng zawngah kan chuh dawn a ni", a ti. Hemi rual hian boruak awmdan azirin Samajwadi leh Bahujan Samaj Party ṭangrual pawl chu an zawm mai thei niin a sawi bawk. 

Rajbhar chuan BJP chuan Social Justice Committee rawtna siamte chu Lok Sabha inthlanpui neih hma thla rukah hman a tiam tih a sawi a, mahse tun thlengin an thutiam hi an la tihlawhtling lo a ni, a ti. He committee hi nikum May thlaa din a ni a, state sorkar hnena rawta a thehluhah backward caste chu category pathum -  ''pichda'' (backward), ''ati picchda'' (very backward) leh ''sarvadhik picchda'' (most backward) a ṭhen a rawt a ni. UP-ah hian vote nei zingah backward class hi 44% zet an tling a ni. 



Share this Post

Login to comment
No Comments